पर्सा, जेठ १३ — जिल्ला प्रहरी कार्यालय पर्साले ३१९ किलो चरेससहित एक ट्रकचालकलाई पक्राउ गरेको छ। विशेष सूचनाका आधारमा परवानीपुर चोकमा मालवाहक ट्रक (प्र. २–०३–००१ ख ६३४८) रोकी चेकजाँच गर्दा चरेस फेला परेको हो।
बुधबार साँझ ७:३० बजे वीरगञ्ज–२१ परवानीपुर चेकपोस्टबाट पक्राउ परेका व्यक्ति मकवानपुरको थाहा नगरपालिका–१२ निवासी ३६ वर्षीय बुद्धिबहादुर स्याङ्तान हुन्।
प्रहरीका अनुसार चरेस १३ पोका गरी जम्मा ३१९ किलो बरामद भएको छ। साथै स्याङ्तानको हाफपाइन्टको दाहिने खल्तीबाट नेपाली रुपैयाँ १ लाख ९२ हजार पनि फेला परेको छ।
हेटौंडाबाट ड्राइपोर्टतर्फ जाँदै गरेको ट्रक वडा प्रहरी कार्यालय श्रीपुर, प्रहरी चौकी श्रीसिया, र परवानीपुर प्रहरी चौकीको संयुक्त टोलीले रोकेको हो। पक्राउ परेका चालकलाई जिल्ला अदालतबाट पाँच दिनको म्याद थपेर हिरासतमा राखी थप अनुसन्धान भइरहेको प्रहरी उपरीक्षक गौतम मिश्रले जानकारी दिएका छन्।
