नागरिकको जीउधनको सुरक्षामा कमजोरी नगर्न सुरक्षा निकायका प्रमुखलाई निर्देशन, आपसी समन्वय र सूचना आदानप्रदानमा जोड
काठमाडौं । प्रधानमन्त्री वालेन्द्र शाहले मुलुकको शान्ति–सुरक्षा व्यवस्था चुस्त, प्रभावकारी र भरपर्दो बनाउन सुरक्षा निकायका प्रमुखहरूलाई कडा निर्देशन दिएका छन् ।
बिहीबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा आयोजित बैठकमा देशको पछिल्लो सुरक्षा अवस्थाबारे जानकारी लिँदै प्रधानमन्त्री शाहले नागरिकको जीउधनको सुरक्षामा कुनै पनि प्रकारको कमजोरी हुन नदिन निर्देशन दिएका हुन् ।
बैठकमा प्रधानसेनापति अशोकराज सिग्देल, नेपाल प्रहरीका महानिरीक्षक डा. मनोजकुमार केसी र सशस्त्र प्रहरी बलका महानिरीक्षक नारायणदत्त पौडेल सहभागी थिए ।
प्रधानमन्त्रीको सचिवालयका अनुसार बैठकमा विशेषगरी चाडपर्वका समयमा हुन सक्ने सम्भावित सुरक्षा चुनौती, नागरिकको सुरक्षा व्यवस्थापन तथा मुलुकको समग्र शान्ति–सुरक्षाको अवस्थाबारे विस्तृत छलफल भएको थियो ।
सो क्रममा प्रधानमन्त्री शाहले अपराध नियन्त्रणका विषयमा ‘शून्य सहनशीलता’को नीति अपनाउन सुरक्षा निकायका प्रमुखहरूलाई निर्देशन दिएका छन् । अपराधजन्य गतिविधि नियन्त्रण गर्न प्रभावकारी रूपमा काम गर्न र सुरक्षाका सवालमा कुनै सम्झौता नगर्न उनले जोड दिएका हुन् ।
त्यसैगरी, मुलुकको आन्तरिक सुरक्षा व्यवस्था थप सुदृढ बनाउन नेपाली सेना, नेपाल प्रहरी र सशस्त्र प्रहरी बलबीचको समन्वय तथा सहकार्यलाई प्रभावकारी बनाउनुपर्नेमा प्रधानमन्त्री शाहले जोड दिएका छन् ।
उनले सुरक्षा निकायबीच गुप्तचर सूचनाको समयमै आदानप्रदान, आपसी सहयोग र समन्वयलाई थप मजबुत बनाउँदै सम्भावित सुरक्षा चुनौतीको समयमै पहिचान र नियन्त्रण गर्नुपर्ने आवश्यकता औँल्याएका छन् ।
