२० असार, वीरगञ्ज ।तस्करीको समान नियन्त्रण लिन गएको प्रहरीमाथि आक्रमण हुदा ६ जना घाइते भएको छ | मधेस प्रदेशको धनुषामा सशस्त्र प्रहरी र तस्कर समूहबिच झडप भएका छन् ।
तस्कर समूहले धनुषा जिल्लाको विदेह नगरपालिका–२ स्थित नेपाल–भारत सीमामा तस्करीको सामान भित्र्याएको सूचनाका आधारमा जाँच गर्न पुगेको सशस्त्र प्रहरीको टोलीमाथि आक्रमण गर्दा ६ जना सशस्त्र प्रहरी घाइते भएका छन् ।
जिल्ला प्रहरी कार्यालय धनुषाका प्रवक्ता, प्रहरी नायव उपरीक्षक (डिएसपी) वरुणबहादुर सिंहको अनुसार, घाइते भएका प्रहरीको प्रादेशिक अस्पताल जनकपुरमा उपचार भइरहेको छ । उनीहरूको अवस्था सामान्य रहेको उनले बताए ।
स्थिति नियन्त्रणमा लिने क्रममा चार राउन्ड हवाई फायर र १३ सेल अश्रुग्याँस प्रहार गर्नुपरेको जानकारी आएको उनले बताए ।
घटना बिहीबार साँझ ७ बजेतिर भएको हो । सशस्त्र प्रहरीको टोली पुगे लगत्तै तस्करहरूको समूहले ढुंगामुढा प्रहार गरेको थियो ।झडपका क्रममा तस्कर समूहका कोही घाइते भएको र कुनै सामान बरामद भएको विवरण नआएको डिएसपी सिंहले बताए ।
