धादिङ। धादिङको गल्छी गाउँपालिका–७ स्थित गल्छी चोकमा भारतीय नम्बर प्लेटको बसको ठक्करबाट एक जनाको मृत्यु भएको छ भने एक जना गम्भीर घाइते भएकी छन्।
जिल्ला प्रहरी कार्यालय धादिङका अनुसार आज साँझ काठमाडौंबाट भारततर्फ जाँदै गरेको एआर ०६ बी ५७२८ नम्बरको भारतीय बसले बाटो काट्ने क्रममा रहेका पैदल यात्रीलाई ठक्कर दिएको हो।
दुर्घटनामा गजुरी गाउँपालिका–५ राईगाउँ निवासी ५२ वर्षीय सोमबहादुर राई र उनकी श्रीमती ५५ वर्षीया माया राई गम्भीर घाइते भएका थिए। दुवैलाई तत्काल उद्धार गरी बैरेनी अस्पताल पुर्याइएकोमा उपचारकै क्रममा सोमबहादुर राईको साँझ ६ः२० बजे मृत्यु भएको प्रहरीले जनाएको छ।
प्रहरीका अनुसार मृतक राईको शव बैरेनी अस्पतालमै राखिएको छ। गम्भीर घाइते माया राईलाई थप उपचारका लागि काठमाडौंस्थित राष्ट्रिय ट्रमा सेन्टर पठाइएको छ। उनको अवस्था चिन्ताजनक रहेको बताइएको छ।
दुर्घटनामा संलग्न बस र चालकलाई प्रहरीले नियन्त्रणमा लिएको छ। घटनाबारे थप अनुसन्धान भइरहेको जिल्ला प्रहरी कार्यालय धादिङका सूचना अधिकारी डीएसपी प्रकाश दाहालले जानकारी दिएका छन्।
