वीरगञ्ज| वीरगञ्जस्थित नेशनल मेडिकल कलेज तथा शिक्षण अस्पताल ले पर्सा र बारा जिल्लाका विभिन्न मदरसा तथा यतीमखानामा अध्ययनरत बालबालिकाका लागि कपडा वितरण कार्यक्रम सम्पन्न गरेको छ। सामाजिक उत्तरदायित्व अन्तर्गत आयोजना गरिएको कार्यक्रम कलेजको कन्फरेन्स हलमा सम्पन्न भएको हो।
कार्यक्रममा ५१४ जना बालबालिका, ९३ जना शिक्षक तथा ५ जना महिला कर्मचारी गरी कुल ६१२ जनालाई कपडा वितरण गरिएको कलेजले जनाएको छ। कपडा कलेजका प्रबन्ध निर्देशक शहनवाज अन्सारी, एकेडेमिक डाइरेक्टर डा. रुबी श्रेष्ठ यशमिन तथा एडमिशन अफेयर्स तथा मार्केटिङ डाइरेक्टर अबिद हुसैन अन्सारी ले संयुक्त रूपमा वितरण गरेका थिए।
कपडा वितरण कार्यक्रमअन्तर्गत मदरसा बर्खुलउलूम छपकैया, यतीमखाना छपकैया, मदरसा मदिना जामे मस्जिद, मदरसा दारुल उलूम, यतीमखाना बहुअरी, मदरसा सनवरिया पोखरिया, यतीमखाना इनरुवा, मदरसा दुर्गालिया, मदरसा चेटा, मदरसा मदनिया सिरसिया, लिपन मदरसा, मदरसा कलेया इनरुवा, सोनबरसा मदरसा, गोनपुर गफुरिया मदरसा तथा एगाज निकाह मदरसा का विद्यार्थी तथा शिक्षकहरू लाभान्वित भएका थिए।
कार्यक्रममा वरिष्ठ प्रशासक विश्वनाथ कान्त, मौलाना नुरुल होदा तथा प्रशासन अधिकृत पप्पु सिंह लगायतको उपस्थिति रहेको थियो।
कलेजका अनुसार विपन्न तथा अभिभावकविहीन बालबालिकालाई सहयोग पुर्याउने उद्देश्यले कार्यक्रम आयोजना गरिएको हो। कलेजले चिकित्सा शिक्षा र स्वास्थ्य सेवासँगै सामाजिक उत्तरदायित्वका गतिविधिमार्फत समाजप्रति आफ्नो प्रतिबद्धता निरन्तर रूपमा देखाउँदै आएको जनाएको छ।
