११असार ,वीरगञ्ज ।साइबर सुरक्षाप्रति जनसाधारणलाई सचेत गराउने उद्देश्यले वीरगञ्जमा एक महत्वपूर्ण जनचेतनामूलक प्रशिक्षण कार्यक्रम सम्पन्न भएको छ। जिल्ला प्रहरी कार्यालय पर्साको आयोजनामा असार १० गते बिहान ९ बजे वीरगञ्ज महानगरपालिका वडा नं. १३ मा अवस्थित गौतम माध्यमिक विद्यालयको प्रांगणमा कार्यक्रम सम्पन्न भएको हो।
सामुदायिक प्रहरी साझेदारी कार्यक्रमअन्तर्गत गरिएको सो तालिम कार्यक्रममा करिब ४ सय जना शिक्षक, शिक्षिका तथा विद्यार्थीहरूको उल्लेखनीय सहभागिता रहेको थियो।** प्रमुख अतिथि पर्साका प्रहरी उपरीक्षक (एसपी) गौतम मिश्रले कार्यक्रमको उद्घाटन गर्दै साइबर अपराधको बढ्दो जोखिमप्रति गम्भीर ध्यान दिन आग्रह गरे। उनका अनुसार इन्टरनेट र सामाजिक सञ्जालको प्रयोग तीव्र गतिमा बढिरहेको सन्दर्भमा विभिन्न प्रकारका साइबर अपराध पनि दिनप्रतिदिन नयाँ स्वरूपमा देखा परिरहेका छन्।
कार्यक्रममा सहभागीलाई साइबर अपराधका विविध स्वरूप—जसमा ठगी, हैकिङ, ब्ल्याकमेलिङ, व्यक्तिगत जानकारी दुरुपयोग, अनलाइन द्वेषपूर्ण क्रियाकलापलगायतका विषयबारे जानकारी दिइयो। साथै अपराधीहरूले प्रयोग गर्ने नयाँ प्रविधि र जालसाजीका तरिका र त्यसबाट कसरी जोगिने भन्ने विषयमा पनि तालिम दिइयो।
विद्यार्थी तथा शिक्षकहरूले तालिमलाई निकै उपयोगी अनुभव गर्दै, आफूहरूका अनेक जिज्ञासाहरू राखेका थिए। सहभागीहरूले सामाजिक सञ्जाल प्रयोग गर्दा अपनाउनुपर्ने सावधानी र सुरक्षा उपायबारे जानकारी पाएकोमा सन्तुष्टि व्यक्त गरे।
