काठमाडौं । ७३० राउन्ड गोलीसहित प्रहरीले काभ्रेबाट आठजनालाई पक्राउ गरेको छ । बनेपा नगरपालिका–९ बाट शनिबार (भदौ २८) साँझ उनीहरूलाई पक्राउ गरिएको प्रहरीले जनाएको छ ।
पक्राउ पर्नेमा सोही नगरपालिकाका २६ वर्षीय सिजन सुवाल, २८ वर्षीय सुवास गौतम, १८ वर्षीय एक किशोर, १५ वर्षीय बालक, बाराका २० वर्षीय महेश मुखिया छन् ।
त्यसैगरी मकवानपुरको बकैया गाउँपालिका–६ का २४ वर्षीय सुशान्त लो, काभ्रेको तेमाल गाउँपालिका–२ का २१ वर्षीय तिमोथी तामाङ र पनौती नगरपालिका–१० का ३४ वर्षीय अछुत खड्का छन् ।
जिल्ला प्रहरी कार्यालय काभ्रेबाट खटिएको टोलीले उनीहरूलाई उक्त गोलीसहित पक्राउ गरेको हो । ‘जेनजी’को प्रदर्शनका क्रममा उनीहरूले सुरक्षाकर्मीको हतियार तथा गोली लुटेको आशंका प्रहरीले गरेको छ ।
