राम आर्य
बिरगंज | कंचनजंघा स्कुलले वीरगन्ज कपडा बैंकलाई ११ बोरा कपडा र २ हजार नगद सहयोग हस्तान्तरण गरेको छ। स्कुलका निर्देशक मार्टिन मोक्तान र कक्षा १० का विद्यार्थीहरूको उपस्थितिमा भएको कार्यक्रममा कपडा बैंकका अध्यक्ष लालबाबु सिंहलाई सहयोग हस्तान्तरण गरिएको हो।
सो अवसरमा निर्देशक मोक्तानले बैंकले विपन्न, असहाय तथा विपद् पीडितलाई गरिरहेको निःस्वार्थ सेवाभावप्रति खुशी व्यक्त गर्दै आगामी दिनमा निरन्तर सहयोग गर्ने प्रतिबद्धता जनाए। बैंकका सल्लाहकार अधिवक्ता प्रकाश उपाध्यायले “कोही नाङ्गो नरहोस्” भन्ने मूल मन्त्रसहित कपडा बैंक ६ वर्षदेखि सेवा प्रवाह गर्दै आएको बताए।
कपडा बैंकका अध्यक्ष सिंहले स्कुलले सामाजिक उत्तरदायित्वअन्तर्गत गरेको योगदानप्रति आभार प्रकट गर्दै यसले विद्यार्थीमा सेवाभाव र चेतना जागृत हुने बताए।
