३२असार,सिरहा । सिरहामा दाइजोबापत ६० लाख नगद, कार र घर समेत मागे प्रेम विवाहपछि एक जना युवकले |प्रेम विवाहपछि ठुलो परिमाणमा दाइजो मागेर पत्नीलाई यातना दिएको घटना सार्वजनिक भएको छ । अर्नमा गाउँपालिका–२ ब्रम्हपुरी घर भएका २४ वर्षीय मुकेश प्रधान सुडी र उनको परिवार मिलेर २३ वर्षीया मनीषा कुमारी गामीलाई यातना दिएका हुन् ।मनीषाको माइतीघर कर्जन्हा नगरपालिका–२ बन्दिपुर हो ।
मुकेशले प्रेम विवाह गर्दा ‘दाइजो लिन्न’ भनेको पीडित मनीषाको भनाई छ । तर, विवाह गरेसँगै ६० लाख नगद, २० तोला सुन, कार र राजमार्गमा पर्ने बन्दिपुर भन्ने ठाउँमा जग्गा खरिद गरिदिन दबाब दिएपछि उनले प्रहरीकहाँ जाहेरी दिइन् ।
प्रहरीले सो मुद्दा अदालतमा अनुसन्धान सकेर दर्ता गरेको छ । २०८२ जेठ ७ मा मनीषाले दाइजो विरुद्धको कसुरमा श्रीमान्, सासू र ससुरालाई विपक्षी बनाएर जाहेरी दिइन् । मुलुकी अपराध संहिता २०७४ को दफा– १७४ अनुसार दाइजो लिन पाइँदैन । तर, आफूलाई दाइजो मागेर यातना दिएको मनीषाले रातोपाटीलाई बताइन्, उनले भनिन्, ‘विवाहको बेला मेरो बुवाले १० लाख नगद र ७ लाखको सामान दिनुभएको थियो, त्यतिले पुग्दैन भनेर मलाई यातना दिइरहनुहुन्छ ।’
मनीषाको जाहेरी दर्ता गरेर प्रहरीले ४८ वर्षीया ललिता कुमारी प्रधान सुडीलाई पक्राउ गरेर अनुसन्धान गरेको थियो । अदालतको आदेशले उनी १ लाख धरौटीमा रिहा भएकी छन् । प्रहरीले ५० वर्षीय गौरी शङ्कर प्रधान सुडी, ४८ वर्षीया ललिता कुमारी प्रधान सुडी, २४ वर्षीय मुकेश प्रधान सुडीलाई प्रतिवादी कायम गरेको छ ।
ललितपुरमा ब्याचलर अफ सिभिल इन्जिनियरिङको सातौँ सेमेस्टरमा अध्ययनरत मुकेश प्रधान सुडी र उनका बुवा गौरीशंकर प्रधान सुडी विरुद्ध अदालतले पक्राउ पुर्जी जारी गरेको छ । तर, उनीहरू पक्राउ परेका छैनन् ।
