काठमाडौं ।शनिबार बिहानदेखि देशका विभिन्न भागमा सुरु भएको अविरल वर्षाले बाढी र पहिरोको जोखिम उच्च बनेको छ । मौसमविद्हरुले विशेषगरी पहिरो संवेदनशील राजमार्गमा यात्रु चाप बढ्ने भएकाले अस्थायी रूपमा आवतजावत रोक्नुपर्ने सुझाव दिएका छन् ।
भारतको उडिसा नजिक बनेको मौसमी प्रणाली शनिबार बिहानदेखि बिहार हुँदै नेपाल प्रवेश गरेको अनुमान छ । यसले विशेषगरी वीरगञ्ज, जनकपुरलगायत मधेशका जिल्लामा अति भारी वर्षा गराउने सम्भावना छ भने पश्चिमतिर बुटवल, भैरहवा, चितवन, मकवानपुर, हेटौंडा, तनहुँ, गोरखा हुँदै काठमाडौं उपत्यकासम्म प्रभाव पर्ने देखिएको छ ।
त्रिभुवन विश्वविद्यालयका मौसमविद् डा. विनोद पोखरेलले चितवन, मकवानपुर, काठमाडौं र काभ्रेलगायत क्षेत्रमा यात्रु बढी हुने भएकाले जनसुरक्षाका दृष्टिले राजमार्ग बन्द गर्नु नै उपयुक्त हुने बताएका छन् ।
काठमाडौं उपत्यका भित्रिने नारायणगढ–मुग्लिन–नागढुंगा, हेटौंडा–काठमाडौं, बनेपा–बर्दिबाससहितका सडक खण्ड पहिरो जोखिममा परेका छन् । विपद व्यवस्थापन विज्ञ डा. धर्मराज उप्रेतीले भने,“भारी वर्षा बढेमा होचो ठाउँका सडक डुबानमा पर्न सक्छन् । त्यसैले अत्यावश्यक काम बाहेक उपत्यकाभित्रै पनि मानिसले यात्रा नगरे उत्तम हुन्छ ।”
हनुमन्ते, बागमती, धोबीखोला, नख्खु र विष्णुमती नदी किनारका बस्ती उच्च जोखिममा रहेका छन् । त्यसैले बासिन्दालाई सतर्क रहन आग्रह गरिएको छ ।
यसबीच, बीपी राजमार्ग, कान्तिपथ र हेटौंडा–भैंसे–काठमाडौं सडकमा रातको समयमा सवारी सञ्चालन रोक लगाइएको छ । जिल्ला प्रशासन कार्यालय काठमाडौंले समेत राति उपत्यका भित्रिने–निस्किने यात्रा नगर्न आग्रह गरेको छ ।
मौसमविद्हरुका अनुसार, आइतबार रातिसम्म कोशी प्रदेशमा भारी वर्षा हुने र सोमबार बिहानदेखि क्रमिक सुधार आउने अनुमान छ । तर त्यसभन्दा अघि कम्तीमा दुई दिन सरकार, स्थानीय निकाय र बस्ती सबै तहमा उच्च सतर्कता अपनाउन चेतावनी दिइएको छ ।
