१०असोज,काठमान्डौ । विभिन्न क्षेत्रमा कार्यरत २४ जना प्रहरी कर्मचारी सम्पर्कविहीन रहेको भन्दै तत्काल सम्पर्कमा आउन सूचना प्रहरी प्रधान कार्यालय नक्सालले जारी गरेको छ।
प्रहरी प्रधान कार्यालय अन्तर्गत महानिरीक्षकको सचिवालयको कानुन शाखाले आज सूचना जारी गर्दै ती कर्मचारीहरू आफूखुसी कार्यालयमा गैर हाजिर रहेको र खोजतलास गर्दा पनि कुनै सम्पर्क हुन नसकेको बताएको छ।
सूचना अनुसार, प्रहरी नियमावली, २०७१ को नियम ११५ को देहाय (२) बमोजिम प्रक्रिया पूरा गरी सूचना टाँस भइसकेको अवस्थामा पनि ती प्रहरी कर्मचारीले कार्यालयमा सम्पर्क नगरेको जनाइएको छ।
त्यस्तै प्रहरी प्रधान कार्यालयले सूचना प्रकाशित भएको मितिले ७ दिनभित्र गैर हाजिर रहनुको कारण खुलाएर सन्तोषजनक स्पष्टीकरण दिनु पर्ने चेतावनी दिएको छ। त्यस समयमा हाजिर नभए कानुन बमोजिम कारबाही प्रक्रिया अघि बढाइने सूचनामा उल्लेख छ।
कारबाहीको सम्भावना
प्रहरी नियमावली बमोजिम, गैर हाजिर प्रहरी कर्मचारीलाई अनुशासन उल्लङ्घन गरेको मानिने भएकोले थप कारबाहीको प्रक्रिया अगाडि बढ्ने सम्भावना रहेको छ।
सम्पर्कविहीन प्रहरी कर्मचारीहरूले सात दिनभित्र हाजिर नगरेमा कानुनी रूपमा निलम्बन, पदबाट हटाउने जस्ता कारबाहीहरू लागु हुन सक्नेछ।
स्रोत: प्रहरी प्रधान कार्यालय
