पोखरा । रवि लामिछाने विरुद्ध दर्ता गरिएको सम्पत्ति शुद्धीकरण र संगठित अपराधसम्बन्धी अभियोग संशोधन गर्न कास्की जिल्ला अदालत ले अनुमति दिएको छ।
न्यायाधीश हिमलाल बेल्बासे को एकल इजलासले सहकारी ठगीसम्बन्धी अभियोग भने यथावत् कायम रहने गरी अन्य दुई अभियोग हटाउन आदेश दिएको हो।
अदालतले अभियोजन पक्षले दायर गरेको संशोधन निवेदनमा कुनै दुराशय नदेखिएको उल्लेख गर्दै जाहेरवाला र अभियुक्त दुवै पक्षको अधिकारप्रति संवेदनशीलता देखिएको निष्कर्ष निकालेको छ। आदेशअनुसार मुलुकी फौजदारी कार्यविधि संहिता, २०७४ को दफा ३६ बमोजिम मूल, थप र पूरक अभियोगपत्र संशोधन गरिएको हो।
अदालतको आदेशमा सहकारी ठगीको अभियोग दाबी कायम राखी संगठित अपराध र सम्पत्ति शुद्धीकरणसम्बन्धी अभियोग कायम नरहने गरी संशोधन गरिएको उल्लेख छ। साथै उक्त संशोधन आदेशलाई मूल अभियोगपत्रको अभिन्न अङ्ग मानी मिसिल संलग्न राख्न पनि निर्देशन दिइएको छ।
यससँगै अब रवि लामिछाने विरुद्ध सहकारी ठगीसम्बन्धी मुद्दाको सुनुवाइ भने निरन्तर अघि बढ्ने भएको छ।
