आज, काठमाडौं । त्रिभुवन अन्तर्राष्ट्रिय विमानस्थलमा संकटकालीन योजनाको अभ्यास बिभिन्न निकाय मिलि गरिएको छ ।
नेपाल नागरिक उड्डयन प्राधिकरणको समन्वयमा भएको संकटकालीन योजना अभ्यासमा हवाई उडान तथा सुरक्षा र मेडिकल एवम् उद्धारसँग सम्बद्ध नेपाली सेना, सशस्त्र प्रहरी र नेपाल प्रहरीसहित विभिन्न निकायहरु संलग्न रहेका छन् ।
आधा घण्टाका लागि गरिने अभ्यासमा नक्कली जहाजमा आगलागी भएपछि यात्रु तथा चालकदलको उद्धार कसरी गर्ने लगायत अभ्यास गरिन्छ ।
उद्धारका लागि दमकल, एम्बुलेन्सर उद्धारकर्मी कसरी परिचालित गर्ने भन्ने अभ्यास पनि गरिन्छ । संकटकालीन योजना अनुसार गरिने विभिन्न अभ्यासमध्ये ‘एयरक्राफ्ट एक्सिडेन्ट इन एयरपोर्ट’ सम्बन्धी पूर्णकालीन अभ्यास भइरहेको हो ।
विमानस्थलका प्रवक्ता सुवास झाका अनुसार अभ्यास क्रममा विमानस्थल बन्द भएको छैन, बरु उडान–अवतरण सामान्य ढिलो भने हुन सक्छन् ।
अभ्यासबारे आन्तरिक वायुसेवा कम्पनीदेखि नेपाल उडान गर्ने सबै अन्तर्राष्ट्रिय वायुसेवा कम्पनीलाई ‘नोटिस टु एयरमेन’ (नोटाम) जारी गरिएको छ ।
सबै वायुसेवाले उडान–अवतरण सेड्युल मिलाएका छन् । विमानस्थल धावनमार्गको पूर्वपट्टि भागमा पूर्णकालीन अभ्यास भइरहेकाले उडान–अवतरण रोकिएका छैनन् ।
अन्तर्राष्ट्रिय नागरिक उड्डयन संगठन (आईकाओ) को मापदण्ड तथा त्रिभुवन विमानस्थलको एयरपोर्ट इमर्जेन्सी प्लानअनुसार वर्षैपिच्छे अनिवार्य यस्तो अभ्यास गर्नुपर्छ भने जानकारी प्राप्त भएको छ ।
