काठमाडौ। भारतीय प्रधानमन्त्री Narendra Modi ले हरियाणाको जिन्द रेलवे स्टेशनबाट भारतको पहिलो हाइड्रोजन ट्रेनको उद्घाटन गर्नुभएको छ। स्वदेशी प्रविधिमा आधारित यो ट्रेन जिन्द–सोनिपत रेलमार्गमा सञ्चालन हुनेछ।
हाइड्रोजन फ्युल सेल प्रविधिबाट चल्ने यस रेलले वातावरणमा शून्य कार्बन उत्सर्जन गर्ने भएकाले यसलाई भारतको हरित र दिगो रेल यातायाततर्फको महत्त्वपूर्ण उपलब्धिका रूपमा हेरिएको छ। ३,२०० हार्सपावर क्षमतायुक्त यो ट्रेन विश्वकै शक्तिशाली हाइड्रोजन ट्रेनमध्ये एक भएको दाबी गरिएको छ। यसको डिजाइन गति प्रतिघण्टा ११० किलोमिटर रहेको छ भने करिब २,६०० यात्रु बोक्न सक्ने क्षमता रहेको बताइएको छ।
उद्घाटन समारोहकै क्रममा प्रधानमन्त्री मोदीले १२ हजार ४७० करोड भारतीय रुपैयाँभन्दा बढी लागतका राष्ट्रिय राजमार्ग आयोजनाहरूको शिलान्यास गर्नुका साथै १५७ किलोमिटर लामो Delhi–Amritsar–Katra Expressway राष्ट्रलाई समर्पण गर्नुभयो। उक्त एक्सप्रेसवे सञ्चालनमा आएपछि दिल्ली–कटरा यात्रा समय १४ घण्टाबाट घटेर करिब ६ घण्टामा सीमित हुने अपेक्षा गरिएको छ।
समारोहलाई सम्बोधन गर्दै प्रधानमन्त्री मोदीले विगत १२ वर्षमा भारतीय रेल सेवामा व्यापक रूपान्तरण भएको उल्लेख गर्दै जिन्द क्षेत्र सुशासनको उदाहरण बनेको दाबी गर्नुभयो।
यस अवसरमा Ashwini Vaishnaw ले हाइड्रोजन ट्रेनको सञ्चालनलाई भारतीय रेलको ऐतिहासिक उपलब्धि भएको बताउँदै आगामी दिनमा अन्य रेलमार्गमा पनि यही प्रविधि विस्तार गरिने जानकारी दिनुभयो।
