काठमाडौं । प्रधानमन्त्री बालेन्द्र शाह ले सिंहदरबारमा नेपालस्थित १७ देशका राजदूत तथा कूटनीतिक नियोगका प्रमुखहरूसँग सामूहिक संवाद गर्दै सरकारको कूटनीतिक प्राथमिकता र भावी कार्यदिशा सार्वजनिक गर्नुभएको छ।
प्रधानमन्त्री तथा मन्त्रिपरिषद्को कार्यालयमा बुधबार आयोजित उक्त भेटमा भारत र चीन लगायत संयुक्त राज्य अमेरिका, बेलायत, जापान, जर्मनी तथा संयुक्त राष्ट्र सङ्घ जस्ता प्रमुख विकास साझेदारका प्रतिनिधिहरूको सहभागिता रहेको थियो। सहभागी कूटनीतिज्ञहरूले नवनियुक्त प्रधानमन्त्रीलाई बधाई दिँदै नेपालको विकास र जनहितका कार्यक्रमहरूमा सहयोग गर्ने प्रतिबद्धता जनाएका छन्।
सम्बोधनका क्रममा प्रधानमन्त्री शाहले नेपालको परराष्ट्र नीतिलाई सन्तुलित, व्यावहारिक र राष्ट्रिय हितअनुकूल ढंगले अघि बढाउने प्रतिबद्धता दोहोर्याउनुभयो। उहाँले मित्र राष्ट्रहरूसँग पारस्परिक सम्मान र साझा समृद्धिमा आधारित सम्बन्धलाई अझ सुदृढ बनाउने आवश्यकता औंल्याउनुभयो।
प्रधानमन्त्रीले विश्व शान्ति र सहकार्यलाई प्राथमिकतामा राख्दै विशेष गरी वैदेशिक रोजगारीमा रहेका नेपाली श्रमिकहरूको सुरक्षा र हित संरक्षणमा सरकार प्रतिबद्ध रहेको स्पष्ट पार्नुभयो। साथै, सुशासन कायम गर्दै तीव्र आर्थिक विकास र जनताको जीवनस्तर सुधार गर्न अन्तर्राष्ट्रिय समुदायको रचनात्मक सहयोग आवश्यक रहेको उल्लेख गर्नुभयो।
उक्त संवादमा शिशिर खनाल सहित प्रधानमन्त्रीका राजनीतिक सल्लाहकार, मुख्यसचिव र परराष्ट्र सचिव लगायत उच्च सरकारी अधिकारीहरूको उपस्थिति रहेको थियो।
भेटमा सहभागी राजदूतहरूले नेपालको वर्तमान राजनीतिक अवस्था र नयाँ सरकारका प्राथमिकताप्रति चासो व्यक्त गर्दै आगामी दिनमा सहकार्यका क्षेत्र विस्तार गर्ने प्रतिबद्धता जनाएका छन्। यस संवादले नेपाल र अन्तर्राष्ट्रिय समुदायबीचको कूटनीतिक सम्बन्धलाई थप मजबुत बनाउने अपेक्षा गरिएको छ।
