जनकपुरधाम । राष्ट्रिय स्वतन्त्र पार्टी (रास्वपा) को मधेस प्रदेशमा जारी संगठनात्मक अधिवेशन प्रक्रिया आन्तरिक विवादका कारण थप पेचिलो बनेको छ। पार्टीका विभिन्न जिल्ला तथा प्रदेश तहका नेता–कार्यकर्ताले प्रदेश सभापति तपेश्वर यादव र केन्द्रीय प्रवक्ता मनिष झा माथि अधिवेशन प्रक्रियामा हस्तक्षेप गरी आफ्नो पक्षअनुकूल नेतृत्व स्थापित गर्न खोजेको आरोप लगाएका छन्।
पार्टीभित्रको असन्तुष्ट समूहले प्रतिनिधि छनोटदेखि उम्मेदवारी व्यवस्थापनसम्मका प्रक्रियामा पक्षपात भएको दाबी गर्दै अधिवेशन निष्पक्ष ढंगले सञ्चालन हुन नसकेको जनाएको छ। मधेस प्रदेशका केही जिल्ला अध्यक्षहरूले केन्द्रीय नेतृत्वलाई पत्र लेखेर प्रदेश नेतृत्वबाट हस्तक्षेप भएको आरोपसमेत लगाएका छन्। 
धनुषा, सप्तरी, सिराहा, सर्लाही, बारा, रौतहट र पर्सालगायत जिल्लामा प्रतिनिधि चयन, नेतृत्व प्रतिस्पर्धा तथा नयाँ–पुराना कार्यकर्ताबीचको टकरावका कारण अधिवेशन प्रभावित भएको बताइएको छ। कतिपय स्थानमा विवाद बढेपछि अधिवेशन स्थगित गर्नुपरेको अवस्था समेत सिर्जना भएको छ।
विवाद चर्किँदै गएपछि रास्वपाको केन्द्रीय निर्वाचन आयोगले मधेस प्रदेश अधिवेशनसँग सम्बन्धित सम्पूर्ण गतिविधि अस्थायी रूपमा स्थगित गर्दै निष्पक्ष, पारदर्शी र विधिसम्मत प्रक्रिया सुनिश्चित गरेपछि मात्रै नयाँ कार्यतालिका सार्वजनिक गर्ने जनाएको छ।
यता आरोपको विषयमा पार्टीका केही नेताहरूले भने अधिवेशनमा प्रतिस्पर्धा हुनु लोकतान्त्रिक अभ्यास भएको र विवादलाई अनावश्यक रूपमा बढाइचढाइ गरिएको दाबी गरेका छन्। उनीहरूले प्रक्रियागत समस्या समाधान गरेर अधिवेशन सम्पन्न गरिने बताएका छन्।
रास्वपाको पहिलो महाधिवेशन नजिकिँदै गर्दा मधेस प्रदेशमा देखिएको यो विवादले पार्टीभित्रको शक्ति सन्तुलन, नेतृत्व चयन र संगठन विस्तारको प्रक्रियामाथि गम्भीर प्रश्न खडा गरेको राजनीतिक विश्लेषकहरूको भनाइ छ।
