१६ असार, काठमाडौं । रास्वपा भर्खरै स्थापना भएको र पार्टीभित्र प्रणाली बनिसकेको थिएन । त्यतिखेर महामन्त्री तथा प्रवक्ता मुकुल ढकालले एउटा नियम ल्याए– बैठक पूर्ण गोप्य हुनुपर्ने । अचेल मोबाइलमा क्यामेरा, रेकर्डरसमेत हुने भएकाले बैठक स्थलमा सभापति र आफूले बाहेक फोन लैजान नपाइने ।
फेरी ढकालले नै बुधबारका लागि डाकिएको केन्द्रीय समिति बैठक लाइभ प्रसारण गर्न माग गरेका छन् । देश दौडाहापछि काठमाडौं फर्केर सभापति रवि लामिछानेलाई ३२ पाने प्रतिवेदन बुझाएका उनीबारे पार्टीभित्र कोणप्रतिकोणबाट टिप्पणी भइरहेको छ ।
केन्द्रीय सदस्यहरुले महामन्त्री ढकाल अनावश्यक उत्तेजनामा आउने र कडिकडाउ गर्ने भएकाले अलोकप्रिय भएको टिप्पणी गरिरहेका छन् ।
ढकालले भने ‘जे जस्तो छ, त्यही रुपमा प्रकट होस्’ भनेर बैठक लाइभ हुनुपर्ने माग गरेको बताए दिए ।
आफ्नो मागबारे आइतबार ढकालले भने, ‘पार्टीका बैठकमा फोकस हुन सकियोस् भनेर त्यस बेला फोन बैठकस्थलभन्दा बाहिर छाडौं भन्ने नियम ल्याइएको थियो । तर फोन जहाँ राखे पनि कापीमा टिपेर समेत मिडियामा दिइहाल्दा रहेछन् । अब चाहिँ म लाइभ गर्नुपर्छ भन्नेमा हो ।’
आफ्नो मागबारे सभापतिले जवाफ दिइनसकेको उनले बताए ।
पार्टीभित्र जुनसुकै कुरा पनि महामन्त्रीले बिगार्यो भन्ने भाष्य बनाउन लागिएको भन्दै उनले आपत्ति जनाए ।
‘कांग्रेसले त लाइभ गर्न थाल्यो, हामीले पनि लाइभ गर्ने |’ उनले बताए ।
प्रतिवेदन सार्वजनिक नगरी बैठक नै बस्न नदिने अडान राखेका ढकाल किन आफ्नो माग पूरा नहुँदै सहमत भए त ?
ढकालले भने, ‘बैठक लाइभ होस् । म त्यहीँ प्रतिवेदन पढिहाल्छु नि ।’
