१६ भदौ,वीरगञ्ज । वीरगञ्ज महानगरपालिकाका पूर्वमेयर विजय सरावगीले दिएको राजीनामा एमालेले अस्वीकृत गरेको छ ।एमाले शीर्षस्थ नेतृत्वलाई सरावगीले जिल्लाको नेतृत्वले मनपरी ढंगले पार्टी चलाइरहेको कारण बताउदै राजीनामा दिएको जानकारी गराएपछि राजीनामा अस्वीकृत गरिएको हो ।
एमाले पार्टी महासचिव शंकर पोखरेलले राजीनामा अस्वीकृत भएको जानकारी गराउँदै सरावगीले उठाएको माग बारे पार्टी गहन छलफल गर्ने प्रतिबद्धता जनाए ।
महासचिव पोखरेल पूर्व मेयर सरावगीलाई एमाले बस्न आग्रह गर्दै भने, ‘तपाइले जिल्ला नेतृत्वको बारेमा भनेको मुद्दाहरु गम्भीर छन्, केन्द्रले त्यसको छिनोफानो गर्नेछ । तर तपाइहरु जस्तो कार्यकर्ता पार्टी छोड्नु हुँदैन् । पार्टीलाई अझ बलियो बनाउने काम गरिरहनुपर्छ ।’
महासचिव पोखरेलसहितका नेतृत्वलाइ पूर्व मेयर सरावगीसंग गएका टोलीहरुले जिल्लाको नेतृत्वले एमालेलाई सखाप पार्ने तथा गुट उपगुटको राजनीतिक गरिररेको गुनासो गरेका थिए । जिल्लाको ‘डेलिगेसन’ टोलीले केन्द्रका शीर्षस्थ नेतृत्वलाई यस्तो गुनासो गरेपछि एमाले महासचिव पोखरेलसहितका शीर्षस्थ नेतृत्वले तत्काल समस्या समाधान गर्ने प्रतिबद्धता जनाएका थिए ।
सरावगीको नेतृत्वमा गएको टोलीले पूर्वराष्ट्रपति विद्यादेवी भण्डारी, शंकर पोखरेल, रघुविर महासेठसहितका शीर्षस्थ नेतृत्वसंग भेटघाट गरेको थियो ।
