१६ चैत, वीरगञ्ज ।पर्सा वीरगञ्ज महानगरपालिका वडा नम्बर १६ इलाका प्रहरी कार्यालय नगवा अगाडि शनिबार विहान एक महिलाको शव फेला परेको छ। मृतक वीरगञ्ज वडा नम्बर ४ नर्सिङ क्याम्पस क्षेत्रमा बस्ने अंसुईया अग्रवाल रहेको जिल्ला प्रहरी कार्यालय पर्साले पुष्टि गरेको छ।
महिलाको मृत्युको कारण हालसम्म यकिन हुन नसके पनि प्रारम्भिक अनुसन्धानका क्रममा उनको टाउको छेउमा घाउ देखिएको प्रहरीले जनाएको छ। घटनास्थलको अवस्था हेर्दा कुनै जंगली जनावरको आक्रमण वा लडेर घाइते भएको हुनसक्ने अनुमान गरिएको छ। यद्यपि, शव परीक्षण रिपोर्ट आएपछि मात्र वास्तविक कारण थाहा हुन सक्ने प्रहरीको भनाइ छ।
शव परीक्षणका लागि अग्रवालको शव वीरगञ्जस्थित नारायणी अस्पताल पठाइएको छ। घटनाबारे थप अनुसन्धान भइरहेको प्रहरी स्रोतले जनाएको छ।
