वीरगञ्ज । करीब आठ वर्षदेखि भाडाको भवनमा सञ्चालन हुँदै आएको वीरगञ्ज महानगरपालिका–१२ को वडा कार्यालय तथा स्वास्थ्य चौकी अब आफ्नै नवनिर्मित भवनमा सारिएको छ। शुक्रबारदेखि सेवा औपचारिक रूपमा नयाँ भवनबाट प्रदान थालिएको हो।
संघ सरकारको १ करोड २५ लाख रुपैयाँ लागतमा मुर्ली पोखरी नजिक निर्माण गरिएको दुई तले आधुनिक भवनको उद्घाटन मेयर राजेशमान सिंहले हिन्दू विधिअनुसार पूजापाठ गरी गरे। वडाध्यक्ष सुरेश प्रसाद गुप्ताले उद्घाटनसम्बन्धी जानकारी दिए।
नयाँ भवनको भुईँतलामा स्वास्थ्य चौकी र दोस्रो तलामा वडा कार्यालय सञ्चालनमा ल्याइएको छ। आफ्नै भवन सञ्चालनमा आएपछि सेवाग्राही तथा बिरामीहरूलाई अझ सहज, प्रभावकारी र दृढ सेवा प्रदान गर्न सकिने वडाध्यक्ष गुप्ताले बताए।
उद्घाटन समारोहमा मेयर सिंहका साथै प्रमुख प्रशासकीय अधिकृत अरबिन्दलाल कर्ण, वडा सदस्यहरू दिपक डंगोल र सीमा बैठा, वडा सचिव मुकेश दास, कर्मचारी तथा स्वास्थ्यकर्मीहरू उपस्थिति थिए।
