बिरगंज | मधेस प्रदेशमा लामो समयदेखि रिक्त रहँदै आएको सभामुख पदमा अब नयाँ नेतृत्व चयन हुने भएको छ। प्रदेशसभा उपसभामुख बबिता राउतका अनुसार आगामी पुस ६ गते बस्ने प्रदेशसभा बैठकबाट निर्वाचन प्रक्रियामार्फत नयाँ सभामुख चयन गरिने निश्चित भएको हो।
यसअघि बुधबार नै निर्वाचन प्रक्रिया अघि बढाउने तयारी भए पनि नेकपा एमालेको ११औँ महाधिवेशनका कारण सम्बन्धित सांसदहरू व्यस्त हुनुपर्ने विशेष परिस्थितिले निर्वाचन तालिका केही दिनका लागि सारिएको उपसभामुख राउतले जानकारी दिइन्। सभामुख चयनका लागि आवश्यक निर्वाचनसम्बन्धी विस्तृत कार्यतालिका र सूचना तत्काल सार्वजनिक गर्न प्रदेशसभा सचिवालयलाई निर्देशन दिइसकिएको छ।
सभामुखको निर्वाचनलाई मधेस प्रदेशको संसदीय राजनीति र शक्ति सन्तुलनका दृष्टिले महत्वपूर्ण रूपमा हेरिएको छ। लामो समयदेखि सभामुख पद रिक्त रहँदा प्रदेशसभाका विभिन्न महत्वपूर्ण काम प्रभावित हुँदै आएका थिए। यस्तो अवस्थामा पुस ६ गते निर्वाचन मिति तय हुनुले राजनीतिक वृत्तमा नयाँ चहलपहल सिर्जना गरेको छ।
नेकपा एमालेको महाधिवेशन सम्पन्न भएलगत्तै प्रदेशका सांसदहरू जनकपुरधाम केन्द्रित हुने र दलीय सहमति वा प्रतिस्पर्धामार्फत प्रदेशसभाले नयाँ सभामुख पाउने अपेक्षा गरिएको छ। यससँगै प्रदेशसभा सचिवालयले निर्वाचनका लागि आवश्यक प्रशासनिक तयारीलाई तीव्रता दिएको छ।
