काठमाडौं । नेकपा एमालेको मतगणना प्रक्रिया सुरु भएको छ । केन्द्रीय निर्वाचन आयोगका उपाध्यक्ष सानुराज पोखरेलका अनुसार, मतदानमा प्रयोग गरिएका मेसिनबाट चिप्स निकाल्ने काम पूरा भएपछि मतगणना औपचारिक रूपमा सुरु गरिएको हो ।
आयोगका अनुसार, ८० वटै मतदान मेसिनबाट चिप्स निकाल्ने प्रक्रिया सकिएको छ । करिब बिहान ११ बजेतिर निर्वाचनको नतिजा सार्वजनिक गर्ने तयारी रहेको आयोगले जनाएको छ । सबै पदको परिणाम एकैपटक सार्वजनिक गर्ने योजना रहेको छ ।
बिहीबार बिहान सम्पन्न मतदानमा २ हजार २ सय २७ जना महाधिवेशन प्रतिनिधिहरूले नेतृत्व चयनका लागि मतदान गरेका थिए । मतदानका क्रममा ३६ जना प्रतिनिधि भने अनुपस्थित रहेका थिए ।
अध्यक्ष पदमा केपी शर्मा ओली र ईश्वर पोखरेलबीच प्रतिस्पर्धा भएको छ भने महासचिव पदमा शंकर पोखरेल र सुरेन्द्र पाण्डे आमनेसामने छन् । अन्य पदाधिकारी पदहरूमा पनि दुवै पक्षका प्यानल उम्मेदवारहरू प्रतिस्पर्धामा छन् ।
निर्वाचन प्रक्रियाअनुसार, मेसिन लक गरी अलग–अलग कोड नम्बरका आधारमा चिप्स सिल गरिएको थियो । सेन्टर कलेक्शनपछि सर्वपक्षीय बैठक बसेर मात्र नतिजा घोषणा गरिने एमालेले जनाएको छ ।
