वीरगन्ज |नेशनल मेडिकल कलेज, वीरगन्ज र प्रिस्टिन भ्याली ड्राइपोर्ट, वीरगन्जको संयुक्त आयोजनामा श्री नेपाल राष्ट्रिय आधारभूत विद्यालय, वीरगन्जमा निःशुल्क स्वास्थ्य शिविर सफलतापूर्वक सम्पन्न भएको छ।
शिविर बिहान १० बजेदेखि सञ्चालन गरिएको थियो। शिविरमा सर्वसाधारण नागरिकका लागि निःशुल्क स्वास्थ्य परीक्षण, विशेषज्ञ चिकित्सकद्वारा परामर्श तथा आवश्यक औषधि वितरण गरिएको थियो। आयोजकका अनुसार शिविरको मुख्य उद्देश्य मधुमेहलगायत विभिन्न दीर्घकालीन तथा सामान्य स्वास्थ्य समस्याको प्रारम्भिक पहिचान, उपचार परामर्श र स्वास्थ्य सचेतना अभिवृद्धि गर्नु रहेको थियो। शिविरमार्फत जम्मा ३१२ जना नागरिकले स्वास्थ्य सेवा लिएका थिए।
शिविरमा रक्तचाप, रगतमा चिनीको मात्रा, तौल, उचाइलगायत प्रारम्भिक स्वास्थ्य परीक्षणपछि सम्बन्धित विषयका विशेषज्ञ चिकित्सकबाट परामर्श सेवा प्रदान गरिएको थियो। सेवाको सहज व्यवस्थापनका लागि दर्ता, प्रारम्भिक परीक्षण र चिकित्सक परामर्शका लागि छुट्टाछुट्टै कक्षको व्यवस्था गरिएको थियो।
कार्यक्रममा प्रिस्टिन भ्याली ड्राइपोर्टतर्फ प्रमुख कार्यकारी अधिकृत राजीव मोहन झा, दिगोपन विभाग प्रमुख सुवजित नायक तथा आयात–निर्यात विभागका प्रतिनिधि राहुल पटेलको गरिमामय उपस्थिति रहेको थियो। त्यस्तै, नेशनल मेडिकल कलेजतर्फ प्रमुख सूचना अधिकृत इञ्जिनियर प्रदीप कुमार चौधरी, मार्केटिङ प्रबन्धक जितेश चन्द्र दास र विद्यार्थी क्लब अध्यक्ष डा. प्रशान्त भण्डारी सहभागी हुनुहुन्थ्यो।
चिकित्सकीय सेवामा जेनरल फिजिसियन डा. सुधाकर झा तथा स्त्रीरोग विशेषज्ञ डा. मधु साहले प्रत्यक्ष रूपमा स्वास्थ्य परीक्षण र परामर्श सेवा प्रदान गर्नुभएको थियो।
कार्यक्रमका क्रममा वक्ताहरूले समुदायस्तरमै पुगेर स्वास्थ्य सेवा उपलब्ध गराउनु प्रारम्भिक रोग पहिचान, जनस्वास्थ्य प्रवर्द्धन तथा आधारभूत स्वास्थ्य सेवामा पहुँच विस्तारका लागि अत्यन्त महत्वपूर्ण रहेको उल्लेख गर्नुभयो। स्थानीयवासीहरूले यस्ता उपयोगी स्वास्थ्य शिविर आयोजना गरिएकोमा आयोजक संस्थाप्रति आभार व्यक्त गरेका छन्।
निःशुल्क स्वास्थ्य शिविरले समुदायमा स्वास्थ्य चेतना अभिवृद्धि गर्नुका साथै सर्वसाधारणको आधारभूत स्वास्थ्य सेवामा पहुँच विस्तार गर्न महत्वपूर्ण योगदान पुर्याएको आयोजक पक्षले जनाएको छ।
