वीरगञ्ज । प्रेमिकासँग विवाह गराइदिनुपर्ने माग राख्दै नेपाल टेलिकमको करिब ८० मिटर अग्लो टावरमा चढेका एक युवक सुरक्षाकर्मी र परिवारको लामो सम्झाइबुझाइपछि सकुशल तल ओर्लिएका छन्।
घटना सर्लाहीको मलंगवा नगरपालिका–९ स्थित नेपाल टेलिकमको टावरमा शुक्रबार राति भएको हो। जिल्ला प्रहरी कार्यालय सर्लाहीका अनुसार गोडैता नगरपालिका–९ बकैनियाका २४ वर्षीय अफसर आलम टावरको टुप्पोमा चढेका थिए। उनी सर्लाही क्याम्पसमा बीबीएस अध्ययनरत विद्यार्थी हुन्।
प्रहरीका अनुसार आलमले आफूसँगै अध्ययनरत ठाकुर थरकी एक युवतीसँग प्रेम सम्बन्ध रहेको दाबी गर्दै उनीसँग विवाह गराइदिनुपर्ने माग राखेका थिए। उनले टावरबाट आफ्ना साथीलाई फोन गरी माग पूरा नभए हाम फाल्ने चेतावनी दिएपछि घटनाबारे प्रहरीलाई जानकारी पुगेको थियो।
सूचना प्राप्त हुनासाथ नेपाल प्रहरी, नेपाली सेना र सशस्त्र प्रहरी बलको संयुक्त टोली उद्धारमा परिचालित भएको थियो। सुरक्षाकर्मी तथा परिवारका सदस्यहरूले निरन्तर सम्झाइबुझाइ गरेपछि आलम अन्ततः आफैं सुरक्षित रूपमा टावरबाट तल ओर्लिएका हुन्।
जिल्ला प्रहरी कार्यालय सर्लाहीका प्रवक्ता प्रहरी नायब उपरीक्षक वेदप्रसाद गौतमका अनुसार आलमले प्रेमिकालाई घटनास्थलमा बोलाएर विवाहका लागि प्रतिबद्धता जनाउन माग गरेका थिए। तर परिवार र प्रहरीको पहलपछि उनले आफ्नो अडान त्याग्दै सुरक्षित रूपमा तल झरे।
प्रहरीले घटनाबारे थप अनुसन्धान भइरहेको जनाएको छ। प्रारम्भिक अनुसन्धानका आधारमा प्रेम सम्बन्धलाई सफल बनाउन परिवारमाथि दबाब सिर्जना गर्ने उद्देश्यले उनले यस्तो कदम चालेको हुन सक्ने प्रहरीको प्रारम्भिक अनुमान छ।
युवकलाई सकुशल उद्धार गरिएकाले मानवीय क्षति हुन पाएन। प्रहरीले यस्ता संवेदनशील अवस्थाको सामना गर्दा जोखिमपूर्ण कदम नचाल्न र समस्या समाधानका लागि कानुनी तथा पारिवारिक संवादको बाटो अपनाउन सबैलाई आग्रह गरेको छ।
