२० कात्तिक, वीरगञ्ज । तराईबासीको महान पर्व छठ शुरु| तराई मधेसमा मनाइने चारदिने छठ पर्व आजदेखि धार्मिक विधिपूर्वक सुरु भएको छ । ४ दिनसम्म विभिन्न विधि गर्दै मनाइने छठ पर्व आजदेखि तराईको पर्सा, बारा, रौतहट, सर्लाही, महोत्तरी, धनुषा, सिरहा, सप्तरी लगायत तराईमधेशमा धुमधामका साथ सुरु भएको हो ।
४ दिनसम्म मनाइने यसपर्वको पहिलो दिन आज व्रतीहरुले नहायखाए अर्थात् नुहाएर खाने गर्दछन् । आज व्रतालुले जीउ चोख्याउने काम गर्दछन् ।
यस्तै पर्वको दोस्रो दिन बुधबार खर्ना मनाइनेछ । खर्नाका दिन व्रतीले दिनभरि उपवास निराहार बसेर राति छठ देवतालाई आगमनको निम्तो दिँदै कूल देवताको पूजा गर्नेछन् र राति अरवा अरबाईन (बिनानुन हालेको) खानेकुरा खाने चलन छ ।
त्यस्तै षष्ठीका दिन अर्थात् बिहीबार साँझ गहुँ र चामल ओखल, जातो वा ढिकीमा कुटान पिसान गरी सोबाट निस्केको पीठोबाट बनाइएका विभिन्न गुलियो खाद्यसामग्री ठकुवा, भुसवा, खजुरीया, पेरुकियाजस्ता पकवान र विभिन्न फलफुल तथा मुला, गाजर, बेसारको गाँहो, भोगटे, ज्यामिरी, नरिवल, सुन्तला, केरा नाङ्लो, कोनिया, सरवा, ढाकन, माटोको हात्ती, ठूलो ढाक्कीमा राखी परिवारका सम्पूर्ण सदस्य विभिन्न भक्ति एवं लोकगीत गाउँदै निर्धारित जलाशय नजिक बनाएको छठ घाटसम्म पुग्नेछन् ।
विहीबार अस्ताउँदो सूयलाई अर्घ दिईनेछ भने शुक्रबार उदाउँदो सूर्यलाई अर्घ दिएर छठ पर्व समापन हुनेछ ।
