जनकपुरधाम । संविधान दिवसको अवसरमा शनिबार जनकपुरधाममा राष्ट्रिय एकता दलले संविधानका केही प्रावधानप्रति असन्तुष्टि जनाउँदै विरोध प्रदर्शन गरेको छ।
दलले नेपालको संविधानमा रहेको धर्मनिरपेक्षताको व्यवस्था खारेज गरी नेपाललाई हिन्दूराष्ट्र घोषणा गर्नुपर्ने माग गर्दै धनुषाको जिल्ला प्रशासन कार्यालय अगाडि प्रदर्शन गरेको हो।प्रदर्शनमा सहभागीहरूले ‘संविधानलाई स्वागत छ, धर्मनिरपेक्षता असह्य छ !’ र ‘संवैधानिक संशोधन गर, हिन्दूराष्ट्र घोषणा गर !’ लगायतका नारा लगाएका थिए।
संविधान निर्माणका क्रममा भएका त्रुटिहरू सच्याउँदै धर्मनिरपेक्षताको व्यवस्था हटाएर नेपाललाई हिन्दूराष्ट्र कायम गर्नुपर्ने मागसहित प्रदर्शन गरिएको राष्ट्रिय एकता दलका नेता दिलीप मण्डलले बताए।प्रदर्शनमा दलका नेताहरू मनिष पूर्वे, रणधीर यादव, श्याम साहलगायतको सहभागिता रहेको थियो।
