८भदौ,काठमाडौं-तनहुँको आँबुखैरेनी गाउँपालिका-२ ऐनापहरास्थित मर्स्याङ्दी नदीमा शुक्रबार भएको बस दुर्घटनामा घाइते यात्रीहरूलाई भेट्न र मृतक शवहरू लिएर जान भारत सरकारले एक केन्द्रीय मन्त्रीलाई काठमाडौँ पठाउने भएको छ ।
भारतका प्रधानमन्त्री नरेन्द्र मोदीको निर्देशनमा सरकारकी युवा तथा खेलकुद राज्यमन्त्री रक्षा खडसे आज बिहान काठमाडौँ आउने भएकी छिन । साथमा महाराष्ट्र जलगांवका एकजना विधायक पनि आउने जानकारी भएको छ ।
घाइते १६ भारतीय यात्रीको महाराजगंजस्थित टीचिंग अस्पतालमा उपचार हुदैछ । घाइते यात्रुको उपचारको लागि टीचिंग अस्पताल प्रशासनले विशेष व्यवस्था गरेको छ । सामान्य घाइते भएका ३ जनालाई काठमाडौँस्थित भारतीय दूतावासको समन्वयमा गोरखा निवास गेस्ट हाउसमा राखिएको छ ।
पोखराबाट काठमाडौंतर्फ जाँदै गरेको भारतीय नम्बर प्लेट यु.पी ५३ एफ.टी.७६२३ नम्बरको बस मस्र्याङ्दी नदीमा खस्दा २७ जनाको मृत्यु भएको थियो । जसमध्ये २६ जनाको आँबुखैरेनी र १ जनाको चितवनमा मृत्यु भएको जिल्ला प्रहरी कार्यालय तनहुँले बताएको छ ।
