२९ जेठ, काठमाडौं । भारतको अहमदाबादमा बिहीबार भएको एअर इन्डियाको भीषण विमान दुर्घटनामा २ सय ४२ जनाको मृत्यु भएको पुष्टि भएको छ। अहमदाबादका प्रहरी आयुक्त जीएस मलिकलाई उद्धृत गर्दै समाचार संस्था एपीले दिएको जानकारीअनुसार, विमानमा सवार कोही पनि जीवित नरहेको पाइएको छ।
विमानमा २३२ यात्रु र १० जना चालक दलका सदस्य सवार थिए। एअर इन्डियाको बोइङ ७८७ ड्रिमलाइनर विमानले लण्डनको ग्याटविक विमानस्थलका लागि उडान भरेको केही मिनेटमै दुर्घटनामा परेको हो।
विमान टेकअफ भएको केही समयमै अहमदाबादस्थित सरदार बल्लभभाइ पटेल अन्तर्राष्ट्रिय विमानस्थल नजिकैको एक आवासीय क्षेत्रमा ठोक्किएको थियो। सो क्षेत्र अस्पतालका चिकित्सकहरू बसोबास गर्ने स्थान पनि हो। दुर्घटनास्थलमा कार्यालयहरूसमेत रहेका कारण केही स्थानीयले पनि ज्यान गुमाएको हुन सक्ने प्रहरी आयुक्त मलिकले बताएका छन्।
प्रहरीका अनुसार हालसम्म २४२ सवार सबै जनाको ज्यान गएको प्रारम्भिक जानकारी आए पनि, मारिएका व्यक्तिहरूको संख्या यकिन गर्न र उनीहरूको पहिचान खुलाउने कार्य जारी रहेको छ। दुर्घटनाको सटिक विवरण तथा कारणबारे पनि अनुसन्धान प्रारम्भ गरिएको बताइएको छ।
भारतको अहमदाबादको भीषण विमान दुर्घटना पछिल्ला वर्षहरूमा भएका विमान दुर्घटनामध्ये सबैभन्दा जनधनको क्षति भएको मानिँदैछ। विमान दुर्घटनापछि देशभर शोकको लहर फैलिएको छ।
सरकारी निकायहरूले घटनाको पूर्ण विवरण आउन बाँकी रहेको जनाउँदै, मृतकका परिवारलाई आवश्यक सहयोग र सूचना उपलब्ध गराउन हटलाइन र सहायता केन्द्रहरू सञ्चालन गरिरहेका छन्।
