वीरगञ्ज । पर्सा निर्वाचन क्षेत्र नं. २ का प्रतिनिधिसभा सदस्य सुशिल शाह कानुले हरेक व्यक्तिले एकअर्कालाई सम्मान गर्नुपर्ने र आवश्यक परेको समयमा सहयोग गर्नुपर्ने बताउनुभएको छ।
मानवसेवा आश्रम, वीरगञ्ज–२५ मा दसैँको अवसरमा आयोजित टीका तथा शुभकामना आदानप्रदान कार्यक्रममा बोल्दै सांसद कानुले स्वेच्छाले मानवीय सेवामा जुट्नु तथा असहाय र जरूरतमन्द व्यक्तिहरूलाई सहयोग गर्नु समाजका हरेक व्यक्तिको दायित्व भएको उल्लेख गर्नुभयो।
उहाँले समाजमा मानवता, आपसी सद्भाव र सहयोगको भावना बलियो बनाउन सबैले आ–आफ्नो तर्फबाट योगदान दिनुपर्ने बताउनुभयो। समाजमा रहेका असहाय, बेसहारा तथा समस्यामा परेका व्यक्तिहरूलाई सहयोग गर्नु मानवीय कर्तव्य भएको उहाँको भनाइ थियो।“हरेक व्यक्तिले एकअर्कालाई सम्मान गर्नुपर्छ र सकेसम्म एकअर्कालाई सहयोग गर्नुपर्छ। मानवता र आपसी सद्भाव नै समाजको वास्तविक शक्ति हो,” उहाँले भन्नुभयो।
दसैँजस्ता चाडपर्वले आपसी प्रेम, सद्भाव र भाइचाराको सम्बन्धलाई थप मजबुत बनाउने उल्लेख गर्दै उहाँले यस्ता अवसरमा असहाय तथा जरूरतमन्द व्यक्तिहरूलाई सम्झनु र उनीहरूसँग खुसी साटासाट गर्नु महत्वपूर्ण हुने बताउनुभयो।मानवसेवा आश्रममा आयोजित कार्यक्रममा टीका तथा शुभकामना आदानप्रदान गर्दै चाडपर्वको खुसी सबैसँग बाँड्ने र मानवीय सेवाको भावनालाई व्यवहारमा उतार्ने सन्देश दिइएको थियो।
