वीरगञ्ज । वीरगञ्ज महानगरपालिका–१६ को सहयोग तथा झरिमाई महिला विकास समाज वीरगञ्जको आयोजनामा महिला हिंसा विरुद्ध जनचेतनामूलक कार्यक्रम दोस्रो दिन पनि सम्पन्न भएको छ ।
वीरगञ्ज महानगरपालिका–१६ स्थित मिथिला टोल मन्दिर टोलमा आयोजित कार्यक्रममा महिला विकास समाजकी उपाध्यक्ष तथा महिला अधिकारकर्मी गिनी मिश्राले प्रशिक्षकको भूमिका निर्वाह गर्दै महिलाले जहाँ रहे पनि आफ्ना समस्या र अधिकारका विषयमा खुलेर बोल्नुपर्ने बताइन् । उनले महिलाले आफ्नो कुरा निडरतापूर्वक राख्दा मात्र कर्तव्य र अधिकार दुवै सुनिश्चित हुने धारणा व्यक्त गरिन् ।
त्यस्तै, झरिमाई महिला विकास समाजका संस्थापक एवं संरक्षक राम आर्यले घरपरिवार र समाजमा छोरा–छोरीबीच समान व्यवहार आवश्यक रहेको बताए । उनले छोरीलाई पनि सम्मान र शिक्षा प्रदान गर्दै अगाडि बढाउन सके समाजमा महिलाको हक अधिकार सुरक्षित हुने उल्लेख गरे ।
कार्यक्रममा वडा प्रतिनिधि रिता देवीसहित ८५ जना दिदीबहिनीहरूको सहभागिता रहेको थियो । कार्यक्रमको सहजीकरण ई. पुरुषोत्तम मिश्राले गरेका थिए ।
