काठमाडौं । चर्चित सेफ सन्तोष साह बैंकिङ कसुरको आरोपमा पक्राउ परेका छन्। उनलाई शुक्रबार राति जनकपुरबाट पक्राउ गरिएको हो।
उपत्यका अपराध अनुसन्धान कार्यालय टेकुले पक्राउको पुष्टि गर्दै साहलाई बैंकिङ कसुर सम्बन्धी मुद्दामा नियन्त्रणमा लिइएको जनाएको छ। कार्यालयका एसएसपी सन्तोष खड्काका अनुसार उनीविरुद्ध परेको उजुरीका आधारमा अनुसन्धान अघि बढाइएको हो।
प्रहरीका अनुसार गैरीधारास्थित एक रेष्टुरेन्ट खरिद गर्ने क्रममा आर्थिक लेनदेनसम्बन्धी विवाद उत्पन्न भएको थियो। साहले उक्त रेष्टुरेन्ट करिब एक करोड ३० लाख रुपैयाँमा खरिद गरेको बताइए पनि सम्झौताअनुसार तिर्न बाँकी रहेको रकम भुक्तानी नगरेको आरोप लगाइएको छ। सोही विषयमा बैंकिङ कसुर सम्बन्धी उजुरी परेपछि प्रहरीले उनलाई पक्राउ गरेको हो।
पक्राउपछि साहलाई आवश्यक अनुसन्धान तथा कानुनी प्रक्रिया अघि बढाउन सम्बन्धित निकायमा पेश गर्ने तयारी गरिएको प्रहरीले जनाएको छ। घटनाबारे थप अनुसन्धान जारी रहेको बताइएको छ।
ब्रिटेनमा आफ्नो पाककलाको प्रतिभाबाट परिचित बनेका सेफ सन्तोष साह नेपालमा पनि विभिन्न पाक कार्यक्रम तथा व्यवसायिक गतिविधिका कारण चर्चित छन्। उनीविरुद्ध लगाइएका आरोपबारे अदालतबाट अन्तिम फैसला नभएसम्म आरोप पुष्टि भएको मानिँदैन। प्रहरीले अनुसन्धान जारी रहेकाले यस सम्बन्धमा थप विवरण आउन बाँकी रहेको जनाएको छ।
