वीरगन्ज । लामो समयदेखि बन्द रहेको वीरगन्ज चिनी कारखाना पुनः सञ्चालनको सम्भाव्यता अध्ययन गर्न सरकारले गठन गरेको कार्यदलले मंगलबार कारखाना परिसरको स्थलगत निरीक्षण गरेको छ ।
उद्योग, वाणिज्य तथा आपूर्ति मन्त्रालयले भदौ १ गते कारखाना पुनः सञ्चालनको सम्भाव्यता अध्ययन गर्न कार्यदल गठन गरेको थियो । सोही कार्यदल स्थलगत अध्ययन तथा अनुगमनका लागि मंगलबार वीरगन्जस्थित कारखाना परिसर पुगेको हो ।
निरीक्षणका क्रममा कार्यदलले कारखानामा रहेका भवन, मेसिनरी, उपकरण, पार्टपुर्जा तथा अन्य भौतिक संरचनाको वर्तमान अवस्थाबारे जानकारी लिएको छ । पुनः सञ्चालनका क्रममा विद्यमान संरचना उपयोग गर्न सकिने अवस्था तथा आवश्यक मर्मत, पुनर्निर्माण र पूर्वाधारबारे समेत अध्ययन भइरहेको छ ।
मन्त्रालयका अनुसार मन्त्रिपरिषद्को निर्णयअनुसार खारेजीमा परेको वीरगन्ज चिनी कारखानाको वर्तमान अवस्था, विगतमा भएका निर्णय, यसअघि तयार गरिएका अध्ययन तथा प्रतिवेदन र पुनः सञ्चालनका लागि चाल्नुपर्ने आवश्यक कदमबारे कार्यदलले अध्ययन गर्नेछ ।
कारखाना सञ्चालनका लागि आवश्यक सम्भावित लगानी, मेसिनरीको अवस्था, संरचना मर्मत तथा पुनर्निर्माण र उत्पादन सञ्चालनका लागि आवश्यक पूर्वाधारलगायत प्राविधिक तथा आर्थिक पक्षलाई अध्ययनको दायरामा राखिएको छ ।
मन्त्रालयले गठन गरेको कार्यदलको संयोजकमा उद्योग, वाणिज्य तथा आपूर्ति मन्त्रालयका सिडिई श्रीकान्त यादव रहेका छन् । सदस्यमा मन्त्रालयकी शाखा अधिकृत ज्योति पौडेल र उद्योग मन्त्रालयका सल्लाहकार श्याम शर्मा रहेका छन् ।
कार्यदललाई अध्ययन पूरा गरी १५ दिनभित्र मन्त्रालयमा प्रतिवेदन पेस गर्ने जिम्मेवारी दिइएको छ । स्थलगत निरीक्षणसहित आवश्यक अध्ययन पूरा भएपछि कार्यदलले वीरगन्ज चिनी कारखाना पुनः सञ्चालन गर्न सकिने अवस्था, आवश्यक प्रक्रिया र सम्भावित कार्ययोजनाबारे सरकारलाई सुझाव दिनेछ ।
लामो समयदेखि बन्द रहेका कारण कारखानाका सम्पत्ति तथा संरचना जीर्ण बन्दै गएका छन् । कारखाना पुनः सञ्चालनको विषय विगतदेखि नै चर्चामा रहे पनि ठोस निर्णय र कार्यान्वयन हुन सकेको छैन । सरकारले पछिल्लो पटक औपचारिक रूपमा सम्भाव्यता अध्ययनका लागि कार्यदल गठन गरेपछि कारखाना पुनः सञ्चालनको सम्भावनाबारे पुनः बहस सुरु भएको छ ।
कार्यदलको प्रतिवेदनले कारखाना पुनः सञ्चालनका लागि आवश्यक प्राविधिक, आर्थिक तथा व्यवस्थापकीय पक्षबारे आधार तयार गर्ने अपेक्षा गरिएको छ । सोही प्रतिवेदनका आधारमा सरकारले वीरगन्ज चिनी कारखाना पुनः सञ्चालनका सम्बन्धमा थप निर्णय लिनेछ ।
