ललितपुर, जेठ १२ ।
छिमेकी दलित महिलामाथि कुटपिट तथा जातीय गालीगलौज र अभद्र व्यवहार गरेको आरोपमा प्रहरीले एक जनालाई पक्राउ गरेको छ। जिल्लाको गोदावरी नगरपालिका वडा नम्बर ५ बस्ने ४२ वर्षीय श्याम श्रेष्ठलाई इलाका प्रहरी कार्यालयले आइतबार बेलुका नियन्त्रणमा लिएको हो।
प्रहरीका अनुसार गत शुक्रबार स्थानीय ३५ वर्षीया दलित महिलासँग सार्वजनिक धारामा पानी भर्ने क्रममा भनाभन भएको र सोही विषयलाई लिएर श्रेष्ठले महिलामाथि कुटपिट गरेका थिए। कुटपिटका क्रममा श्रेष्ठले पीडित महिलालाई सार्वजनिक रूपमै जातीय गद्दार र अपमानजनक शब्द प्रयोग गरी गालीगलौज गरेको प्रत्यक्षदर्शीले बताएका छन्।
कुटपिटबाट घाइते भएकी महिलाको स्थानीय स्वास्थ्य चौकीमा उपचार भइरहेको छ र उनको अवस्था सामान्य रहेको छ। घटना लगत्तै पीडित परिवार र स्थानीय अधिकारकर्मीहरूले जातीय भेदभाव तथा छुवाछूत (कसूर र सजाय) ऐन र अभद्र व्यवहार अन्तर्गत हदैसम्मको कारबाहीको माग गर्दै प्रहरीमा किटानी जाहेरी दर्ता गराएका थिए।
जिल्ला प्रहरी कार्यालयका प्रवक्ताका अनुसार पक्राउ परेका श्रेष्ठमाथि अदालतबाट म्याद थप गरी आवश्यक अनुसन्धान सुरु गरिएको छ। नेपालको कानुनले जातीय आधारमा गरिने जुनसुकै प्रकारका विभेद, गालीगलौज र हिंसालाई गम्भीर अपराध मानेकाले दोषी प्रमाणित भएमा आरोपितलाई कानुन बमोजिम कैद र जरिवाना दुवै सजाय हुने प्रहरीले जनाएको छ। स्थानीय अधिकारकर्मीहरूले भने घटनाको निष्पक्ष छानबिन गरी पीडितलाई न्याय र सुरक्षाको प्रत्याभूति दिलाउन माग गरेका छन्।
