काठमाडौं । राष्ट्रिय स्वतन्त्र पार्टी (रास्वपा)ले मधेश प्रदेशका सात जिल्लासहित प्रदेश अधिवेशनको तयारी अघि बढाएको छ । पार्टीको पहिलो महाधिवेशन सम्पन्न भए पनि मधेश प्रदेशका जिल्ला तथा प्रदेश अधिवेशन हुन बाँकी रहेकाले त्यसका लागि तयारी तीव्र पारिएको हो ।
मंगलबार रास्वपाका नेताहरूले पार्टी मुख्यालय चमतीमा भेला भएर मधेश प्रदेशका सात जिल्लाको अधिवेशनको मिति तय गर्ने तथा पार्टी सभापति रवि लामिछानेको मधेश भ्रमणको तालिका बनाउने विषयमा छलफल गरेका छन् ।
बैठकमा मधेश प्रदेशका जिल्लाहरूमा अधिवेशन सम्पन्न गर्ने कार्यतालिका, संगठन विस्तार तथा अधिवेशनको तयारीबारे छलफल भएको बताइएको छ । साथै सभापति लामिछानेले मधेशका विभिन्न जिल्लामा गर्ने भ्रमणलाई जिल्ला अधिवेशनसँग समन्वय गर्ने गरी कार्यक्रम बनाउने तयारी गरिएको छ ।
मधेशमा पार्टी संगठनलाई थप सक्रिय बनाउने, स्थानीय तहसम्म संगठन विस्तार गर्ने तथा अधिवेशनमार्फत नयाँ नेतृत्व चयन गर्ने रास्वपाको तयारी छ ।पार्टीले सातै जिल्लाको अधिवेशन सम्पन्न गरेपछि मधेश प्रदेश अधिवेशन आयोजना गर्ने तयारी गरेको छ । त्यसका लागि जिल्ला अधिवेशनको मिति र प्रदेश अधिवेशनको सम्भावित कार्यतालिकालाई एकीकृत रूपमा अघि बढाउने तयारी भइरहेको छ ।
मधेश प्रदेश रास्वपाका लागि राजनीतिक रूपमा महत्वपूर्ण क्षेत्र भएकाले सभापति लामिछानेको भ्रमणलाई समेत संगठन सुदृढीकरण र कार्यकर्ता परिचालनसँग जोडेर अघि बढाउने रणनीति पार्टीले बनाएको छ ।रास्वपाले यसअघि महाधिवेशन सम्पन्न गरिसकेको भए पनि मधेश प्रदेशका जिल्ला तथा प्रदेश अधिवेशन बाँकी रहेकाले अब ती अधिवेशनलाई प्राथमिकताका साथ सम्पन्न गर्ने तयारी थालेको हो ।
