काठमाडौं । भोटेकोशी नदीमा आएको विनाशकारी बाढीबाट उत्पन्न विपद्पछि प्रधानमन्त्री दैवी प्रकोप उद्धार कोषमा सहयोग रकम जम्मा गर्ने क्रम तीव्र भएको छ । पछिल्लो ३६ घण्टामै कोषमा १ अर्ब ९१ करोड रुपैयाँभन्दा बढी रकम संकलन भएको छ ।
अर्थ मन्त्रालयका अनुसार बुधबार मध्याह्नदेखि बिहीबार राति १२ बजेसम्म दाताहरूले सरकारी खातामा १ अर्ब ९१ करोड ८६ लाख ५० हजार ९११ रुपैयाँ जम्मा गरेका छन् । यो रकम थपिएसँगै प्रधानमन्त्री दैवी प्रकोप उद्धार कोषमा जम्मा भएको कुल रकम ४ अर्ब ९ करोड ११ लाख ६० हजार ६७० रुपैयाँ पुगेको छ ।
सरकारले बाढी प्रभावित क्षेत्रलाई संकटग्रस्त क्षेत्र घोषणा गरेपछि उद्धार, राहत तथा पुनःस्थापनाका लागि सहयोग जुटाउने अभियानलाई तीव्रता दिएको हो । यस अभियानको समन्वयका लागि अर्थ मन्त्रालयलाई फोकल मन्त्रालय तोकिएको छ ।
अर्थमन्त्री डा. स्वर्णिम वाग्लेले संस्थागततर्फबाट १ करोड रुपैयाँ वा सोभन्दा बढी सहयोग गर्ने दाताहरूबाट मन्त्रालयमै पुगेर सहयोग रकम स्वीकार गरिरहेका छन् ।
यसैक्रममा बिहीबार मात्रै निजी क्षेत्रका विभिन्न दाताहरूले अर्थ मन्त्रालय पुगेर कोषमा २७ करोड ३३ लाख रुपैयाँ सहयोग हस्तान्तरण गरेका छन् । उक्त रकम बिहीबार दिउँसोको करिब ६ घण्टाको अवधिमा संकलन भएको मन्त्रालयले जनाएको छ ।
विपद्को यस घडीमा सरकारी कोषमा निजी क्षेत्र तथा विभिन्न दाताहरूबाट ठूलो मात्रामा सहयोग जुट्न थालेपछि प्रभावित नागरिकको उद्धार, राहत वितरण तथा पुनर्निर्माणमा थप सहयोग पुग्ने अपेक्षा गरिएको छ ।
