२२ साउन, काठमाडौं । बंगलादेशका राष्ट्रपति मोहमद शहाबुद्दिनले जेलमा रहेकी पूर्वप्रधानमन्त्री एवं प्रतिपक्षी दलकी नेता खालिदा जियालाई थुनामुक्त गर्न आदेश दिएका छन् ।
राष्ट्रपति शहाबुद्दिनबाट विद्यार्थी आन्दोलन नियन्त्रणबाहिर गएपछि प्रधानमन्त्री शेख हसिना राजीनामा दिँदै देश छाड्न बाध्य भएपछि
यस्तो आदेश आएको हो ।
बंगलादेशी सेनाका प्रमुख जनरल वाकर जमानले सोमबार गरेको प्रतिपक्षी दलका नेताहरु सम्मिलित बैठकमा यो विषय उठेको र पूर्वप्रधानमन्त्री जियालाई यथाशिघ्र छाड्ने निर्णय भएको बंगलादेशको दैनिक पत्रिका द डेली स्टारले लेखेको छ ।
‘बैठकले विद्यार्थी आन्दोलनका क्रममा पक्राउ परेका सबैलाई हिरासतमुक्त गर्ने निर्णय पनि गरेको छ’, समाचारमा भनिएको छ । बंगलादेश नेशनलिस्ट पार्टी (बीएनपी) की अध्यक्ष जियालाई सन् २०१८ मा भ्रष्टाचारको आरोपमा १७ वर्ष जेल सजाय सुनाइएको थियो ।
७८ वर्षीया जियाको स्वास्थ्य अवस्था पनि नाजुक रहेको बंगलादेशका स्थानीय सञ्चारमाध्यमहरुले उल्लेख गरेका छन् । देश छाडेकी प्रधानमन्त्री शेख हसिनासँग जियाको लामो दुश्मनी छ ।
उनलाई भ्रष्टाचारको आरोप लागेपछि यो राजनीतिक रुपमा प्रेरित भएको भन्दै बीएनपीले आरोपहरु मिथ्या भएको बताएको थियो ।
आफ्नो श्रीमान् एवं बंगलादेशका पूर्वराष्ट्रपति जिउर रहमान मारिएपछि जियाको राजनीतिक यात्रा सुरु भएको थियो ।जिया बंगलादेशकी पहिलो महिला प्रधानमन्त्री हुन् । रहमानले १९७८ मा स्थापना गरेको बीएनपीमा उनी २ जनवरी १९८२ देखि संलग्न भएकी थिइन् ।
राजीनामा दिएकी प्रधानमन्त्री हसिना भने सोमबार हेलिकप्टरमार्फत भारततर्फ गएकी थिइन् । त्यसपछि उनी लण्डन जान सक्ने बताइएपनि हाल कहाँ छिन् कुनै विवरण सार्वजनिक भएको छैन ।
बंगलादेशमा सेनाले अहिले अन्तरिम सरकार गठनका लागि अग्रसरता लिएको छ । तर, यसको नेतृत्व कसले गर्छ भन्ने टुंगो लागिसकेको छैन ।
