२८ माघ, वीरगञ्ज ।युवाहरुद्वारा सामाजिक सञ्जाल विधेयकको चौतर्फी विरोध र प्रदर्शन भईरहेको छ ।जनकपुरमा पनि विद्येयकविरुद्ध युवाहरूले प्रदर्शन गरेका छन् ।
मधेस प्रदेशको राजधानी जनकपुरको रामानन्द चोकमा आइतबार साँझ मसाल जुलुससहित युवाहरूले प्रदर्शन गरेका हुन् । जुलुसमा सहभागीले सरकारको कदमविरुद्ध नाराबाजी गर्दै विधेयक फिर्ता लिनुपर्ने माग उठाएका छन् ।
विधेयकको विरोधमा काठमाडौंमा पनि आइतबार दिउँसो अनलाइन टीभी पत्रकार सङ्घले प्रदर्शन गरेको थियो ।
अखिल क्रान्तिकारी राजर्षी जनक विश्वविद्यालय, रारा बहुमुखी क्याम्पस र धनुषा जिल्ला समितिको संयुक्त आयोजनामा मसाल जुलुस निकालिएको हो । जुलुसमा सहभागीले विधेयकका हरेक बुँदामा सजाय र जरिवानाको व्यवस्था रहेकाले यसले नागरिक स्वतन्त्रताको हनन गर्ने बताए ।
उनीहरूले सूचना तथा सञ्चारप्रवधिमन्त्री पृथ्वीसुब्बा गुरुङविरुद्ध नाराबाजी गर्दै विधेयक फिर्ता लिन आग्रह गरेका छन् । उनीहरूले यो विधेयकले सामाजिक सञ्जालमा नागरिकहरूको स्वतन्त्रतालाई सीमित गर्ने र सरकारले आफ्ना विरोधीलाई दमन गर्ने हतियारको रूपमा प्रयोग गर्न सक्ने बताएका छन् ।
उनीहरूले यो विधेयक लोकतन्त्र र मानवअधिकारविरोधी रहेको बताउँदै यसको विरोधमा आन्दोलन जारी राख्ने चेतावनीसमेत दिएका छन् ।
