१० चैत,वीरगञ्ज ।बरिष्ठ उपाध्यक्ष रहेको हरि गौतम वीरगञ्ज उद्योग वाणिज्य संघको अध्यक्षमा निर्विरोध चयनभएको छ । आईबार सम्पन्न पदाधिकारीको निर्वाचनमा गौतम नेतृत्व सर्वसम्मत चयन भएको हो ।
कार्यसमितिको बरिष्ठ उपाध्यक्षमा माधव राजपाल, द्वितीय उपाध्यक्षमा मनोज दास, महासचिवमा शिबजी प्रसाद कलवार, कोषाध्यक्षमा अनोज रुंगटा, सचिवमा प्रेमचन्द्र गोयल, सुशान्त चाचान, सह–कोषाध्यक्षमा निरज अग्रवाल, सहसचिवमा नरेश टिवडेवाल निर्विरोध चयन भएको छ ।
एउटा सहसचिवमा अनुप अग्रवाल र प्रभात रुंगटा गरी दुईजनाको उम्मेदवारी परेपछि मतदानबाट टुंगो लगाईएको प्रमुख निर्वाचन अधिकृत बालमुकुन्द खरेलले बताए । उनका अनुसार सहसचिवमा अनुप अग्रवाल १९ मत ल्याई ३ मतले विजयी भएका छन् भने रुंगटाले १६ मत ल्याएका थिए ।
आफुलाई प्रत्यक्ष र अप्रत्यक्ष रुपले निर्वाचित गराउने सम्पूर्ण पदाधिकारी तथा कार्यसमितीलाई धन्यवाद ज्ञापन गर्दै आफ्नो नेतृत्वकालमा सबैलाई मिलाएर जाने प्रतिबद्धता नवनिर्वाचित अध्यक्ष गौतमले ब्यक्त गरे । उनले उद्योगी व्यावसायीहरुको हक हितका मुद्दा आफूले खरो ढंगले उठाउने र समाधानका लागि दबाव सृजना गर्ने बताए ।
संघको विद्यान अनुसार १२ जना पदाधिकारी रहने व्यवस्था रहेको । निवर्तमान अध्यक्ष स्वतः पदाधिकारीमा आउने पनि विद्यानमा व्यवस्था छ । त्यस्तै तृतीय उपाध्यक्ष अर्थात रोजगारदाता समितिको संयोजकको मनोनयन नयाँ कार्यसमितिको पहिलो बैठकले गर्ने व्यवस्था रहेको छ ।
वीरगञ्ज उद्योग वाणिज्य संघको नेतृत्वमा सहमतिमै चयन गर्ने अभ्यास हुदै आएको छ । केही पदमा सहमति हुन नसकेमा मतदानबाट टुंगो लगाउदै आएको छ ।
