राम आर्य
३ वैशाख,वीरगञ्ज । वीरगञ्जमा हनुमान जयन्तीको शोभायात्राको क्रममा धार्मिक सद्भाव भड्काएको आरोपमा पक्राउ परेका ४ जनालाई प्रहरी हिरासतमा राख्न जिल्ला अदालतले म्याद थप गरेको छ भने थप एक जनालाई पनि प्रहरीले पक्राउ गरेको छ।
जिल्ला प्रहरी कार्यालयले ७ दिनको म्याद मागेको थियो। जिल्ला अदालत पर्साले बुधबार पक्राउ परेका चारै जनालाई ६ दिन हिरासतमा राख्न अनुमति दिएको हो। पक्राउ परेकामध्ये २ जनालाई राज्यविरुद्धको कसुर र २ जनालाई आपराधिक उपद्रव गरेको मुद्दा लगाइएको छ।
पर्सा प्रहरीले बुधबार थप १ जनालाई पक्राउ गरेको जनाएको छ। प्रहरीका अनुसार पक्राउ पर्ने व्यक्ति शकिल मियाँ हुन्।त्यस्तै मंगलबार साँझ वीरगञ्जको छपकैयाँबाट शेख खुर्सेद, सलाउदिन मियाँ ठकुराई र रवि सरार्फ तथा नगवाबाट बल्जित सिंहलाई पक्राउ गरिएको थियो।
पर्सा प्रहरीका प्रवक्ता किशोर लम्सालले सिसिटिभी फुटेज, ड्रोन फुटेज र सामाजिक सञ्जालमा आएका भिडियोहरूको विश्लेषणका आधारमा उनीहरूलाई पक्राउ गरिएको जानकारी दिएका छन्।
