२१ साउन,रौतहट । रौतहटको नेकपा माओवादी केन्द्रको भातृ संगठन अखिल क्रान्तिकारी महिला संघ जिल्ला अधिवेशन गरुडा बजारमा भव्य रूपमा सम्पन्न भएको छ ।
अधिवेशनमा सर्वसम्मतद्वारा निर्णय भई यमुनामाई गाउँपालिका वडा नं १ चिकना रौतहटकी सीमा कुमारी पटेल चयन भएकि छिन।
सहिद परिवारकी सदस्य पटेलको श्रीमानको ठूलो दाइ जनयुद्धको दौरान तत्कालीन सुरक्षाकर्मीको गोलीबाट सहादत प्राप्त गरेका थिए, जुन संघर्षको जगमै उहाँको नेतृत्व उभिएको छ ।२०७९ को स्थानीय तहको निर्वाचनमा उपाध्यक्ष पदकी प्रत्यासी रहनुभएकी पटेल ५१ सदस्यीय जिल्ला समन्वय समितिको नेतृत्व गर्ने भएकी छिन् ।
मदेश जस्तो समाजमा अझै महिलाप्रति संकुचित सोच कायमै रहेको अवस्थामा पनि पटेलले प्रत्येक चुनौतीको सामना गर्दै आफूलाई संगठनात्मक रूपमा सबल बनाउँदै लगिरहनुभएको छ ।
पटेलले सामान्य परिवारबाट राजनीतिमा उदाएकी पार्टीको जुनसुकै गतिविधिमा सक्रिय सहभागीता जनाउँदै आएकी छिन् । उहाँको ससुराली घर यमुनामाई गाउँपालिकावडा नं १ चिकना भए तापनि, क्षेत्रको राजनीतिक, सामाजिक र विकास कार्यमा सक्रियता देखाउँदै आउनुभएको छ ।
त्यस्तै अध्यक्ष पटेलको पहलमा संघीय राजधानी काठमाडौँदेखि मधेश प्रदेश तथा स्थानीय तहसम्म समन्वय गरी दर्जनभन्दा बढी विकास योजनाहरू गाउँमा पुर्याउन सफल हुनु भएको छ ।
२०७९ सालको स्थानीय निर्वाचनमा केही मतले पराजित हुनु भएपनि उहाँ जनताको विश्वास जित्न सफल भएकी एक उदाहरणीय सामाजिक कार्यकर्ता बनिरहनुभएको छ । “जनप्रतिनिधि नभएपनि जनताको दुःख–सुखमा सधैं साथ दिनुपर्छ भन्ने विश्वासका साथ म अघि बढेकी हुँ,” पटेलले बताउनुभयो ।
अध्यक्ष पदमा चयन भएपछि पटेलले भन्नुभयो, “महिलालाई राजनीति गर्ने वातावरण अझै सहज छैन । तर म नकारात्मक आलोचना वा समाजको संकुचित सोचको परवाह नगरी आफ्नो उद्देश्य र जिम्मेवारीप्रति प्रतिबद्ध छु ।”
सीमा कुमारी पटेलको नेतृत्वले महिलाहरूमा राजनीतिक सक्रियता र आत्मविश्वास बढाउने विश्वास गरिएको छ ।
