काठमाडौं | चितवन राइनोजले राखिदिएको १४३ रनको लक्ष्य पछ्याउने क्रममा लुम्बिनी लायन्सले पावरप्लेमा २ विकेट गुमाउँदै ५१ रन जोडेको छ। टस हारेर ब्याटिङ गरेको चितवनले दिएको मध्यम लक्ष्य तर्साउँदै लुम्बिनीले सुरुवात भने आक्रामक नै राख्यो।
सबैभन्दा पहिले आउट हुने खेलाडी डार्सी सर्ट रहे। उनले ६ बल खेलेर १ चौका र १ छक्काको सहायताले ११ रन बनाएपछि रिजन ढकालको बलमा बोल्ड भए। ५.३ ओभरको समाप्तीसम्म लुम्बिनीले १ विकेटमा ५० रन पुर्याइसकेको थियो।
त्यसपछि सन्दीप जोरा दोस्रो विकेटको रुपमा पावेलियन फर्किए। ५.४ ओभरमा रिजन ढकालले फ्याँकेको बलमा कुशल मल्लले उनलाई क्याच लिए। सन्दीपले १८ बलमा ४ चौका प्रहार गर्दै २८ रन जोडेका थिए।
हाल क्रीजमा रोहित पौडेल ४ रनमा र दिलिप नाथ शून्य रनमै अविजित छन्। चितवनका लागि दुवै विकेट रिजन ढकालले नै लिएका छन्। चितवनले यसअघि पहिलो खेलमा कर्णाली याक्सलाई ४ विकेटले पराजित गरेको थियो। लुम्बिनी लायन्स भने आज आफ्नो पहिलो खेल खेलिरहेको छ।
