१० पुष, काठमाडौं । राष्ट्रिय मुक्ति पार्टी नेपालका अध्यक्ष राजेन्द्र महतो आगामी फागुन २१ गते हुने प्रतिनिधिसभा निर्वाचनका लागि सप्तरी निर्वाचन क्षेत्र नम्बर २ बाट पनि उम्मेदवारका रूपमा सिफारिस भएका छन् ।
सर्लाहीबाट चुनाव लड्ने तयारी लगभग निश्चित भएको चर्चा चलिरहेका बेला सप्तरी क्षेत्रीय समितिले अध्यक्ष महतोको नाम उच्च प्राथमिकतासहित सिफारिस गरेपछि उनको चुनावी क्षेत्रलाई लिएर नयाँ बहस सुरु भएको छ । सप्तरी–२ को क्षेत्रीय समितिले महतोसँगै पार्टीका महासचिव केशव झा र नेता महेश यादवको नाम समेत केन्द्रमा पठाएको छ ।
अध्यक्ष महतोलाई दुई जिल्लाबाट उम्मेदवारका रूपमा सिफारिस गरिनुलाई मधेस राजनीतिमा उनको प्रभाव र रणनीतिक भूमिकाका रूपमा हेरिएको छ । पार्टीले संगठन विस्तार र उम्मेदवार छनोट प्रक्रिया तीव्र बनाउँदै गर्दा सप्तरीका अन्य क्षेत्रमा पनि उम्मेदवार टुंगो लगाएको छ । सप्तरी निर्वाचन क्षेत्र नम्बर ३ बाट नेता चन्द्रकान्त चौधरी र गजेन्द्रकुमार मण्डललाई उम्मेदवारका रूपमा अघि सारिएको छ ।
‘राष्ट्रिय मुक्ति आन्दोलन’ मार्फत मधेस, थरुहटलगायतका मुद्दा उठाउँदै आएका महतोका लागि सप्तरी–२ लाई प्रतिष्ठाको क्षेत्र मानिन्छ । यहाँ अन्य ठूला दलका प्रभावशाली नेतासँग प्रतिस्पर्धा हुने भएकाले पार्टीले शीर्ष नेतृत्वलाई नै उम्मेदवारका रूपमा अघि सारेको बुझिएको छ ।
अध्यक्ष महतो अन्ततः सर्लाही कि सप्तरीमध्ये कुन क्षेत्रबाट चुनावी मैदानमा उत्रिन्छन् भन्ने विषयले मधेसको समग्र चुनावी समीकरणमा प्रभाव पार्ने देखिएको छ । गृहजिल्ला सर्लाही उनको राजनीतिक आधार क्षेत्र भए पनि सप्तरीका कार्यकर्ताको दबाबले पार्टीभित्र छलफल चर्किएको छ । पार्टीको केन्द्रीय समितिले सिफारिसहरूमाथि छलफल गरी चाँडै अन्तिम निर्णय लिने तयारी गरेको छ ।
