वीरगंज । वीरगंज महानगरपालिकाको १९औँ नगर अधिवेशन सम्पन्न भएको छ । अधिवेशनले गत असोजमा सम्पन्न विशेष अधिवेशनबाट कटौती गरिएको वडातर्फको २५ प्रतिशत बजेट पुनः थप गर्ने प्रस्ताव पारित गरेको छ ।
गत भदौ २३/२४ गते जेन्जी आन्दोलनका क्रममा महानगरपालिकाका संरचनामा भएको क्षतिका कारण असोजमा विशेष अधिवेशन बोलाइएको थियो । उक्त विशेष अधिवेशनले पुनर्निर्माणलाई प्राथमिकता दिँदै वडाको बजेट समेत कटौती गरेको थियो ।
पुनर्निर्माणका लागि आवश्यक स्रोत व्यवस्थापन भइसकेकाले चालु आर्थिक वर्षका लागि १७औँ नगर अधिवेशनले छुट्याएको वडातर्फको बजेट यथावत् रहने गरी १९औँ अधिवेशनबाट निर्णय गरिएको महानगर प्रमुख राजेशमान सिंहले जानकारी दिनुभयो ।
अधिवेशनमा प्रमुख सिंहले चालु आर्थिक वर्षको हालसम्मको आय–व्यय विवरणसमेत प्रस्तुत गर्नुभयो । उहाँका अनुसार हालसम्म विनियोजन गरिएको कुल ३ अर्ब २२ करोड रुपैयाँमध्ये १ अर्ब १३ करोड रुपैयाँ खर्च भइसकेको छ, जुन कुल बजेटको करिब ३३ प्रतिशत हो । चालु खर्चतर्फ ३४.७८ प्रतिशत र पुँजीगत खर्चतर्फ ३२.६४ प्रतिशत खर्च भएको जानकारी पनि उहाँले दिनुभयो ।
महानगरपालिकाले चालु आर्थिक वर्षभित्रै शुलभ औषधि पसल सञ्चालन, प्रयोगशाला विस्तार तथा नगर अस्पताल सञ्चालनमा ल्याउने लक्ष्य लिएको पनि जानकारी गराइएको छ ।
अधिवेशनमा उपप्रमुख इम्तियाज आलम, प्रमुख प्रशासकीय अधिकृत अरविन्द लाल कर्ण, ३२ वटै वडाका वडाध्यक्ष, वडा सदस्यलगायतको सहभागिता रहेको थियो ।
