काठमाडौं|नेपाली कांग्रेसको विशेष महाधिवेशन काठमाडौंको भृकुटीमण्डपमा जारी छ। संस्थापन पक्षले महामन्त्रीद्वय गगन थापा र विश्वप्रकाश शर्मा तथा सहमहामन्त्री फरमुल्लाह मन्सुरलाई कारबाही गरेपछि महाधिवेशन नयाँ नेतृत्व चयनको प्रक्रियामा प्रवेश गरेको हो।
महाधिवेशनस्थल भृकुटीमण्डपमा केहीबेरमै नयाँ नेतृत्व घोषणा गर्ने तयारी भइरहेको छ। नेताहरूका अनुसार, सहमतिमै केन्द्रीय कार्यसमिति घोषणा गर्ने गरी तयारी अघि बढाइएको छ।
यसैक्रममा अहिले कमलपोखरीस्थित एक होटलमा पार्टी नेताहरूबीच आन्तरिक छलफल भइरहेको छ। सो छलफलमा महामन्त्री गगन कुमार थापा पनि सहभागी भएका छन्।
छलफलमा प्रदीप पौडेल, गुरुराज घिमिरे, देवराज चालिसे, डिल्लीराम सुवेदीलगायत नेताहरूको उपस्थिति रहेको बताइएको छ।
