भारत । भारतका प्रधानमन्त्री नरेन्द्र मोदी लगातार सबैभन्दा लामो समय सेवा गर्ने ‘निर्वाचित प्रधानमन्त्री’ बनेका छन्। यस ऐतिहासिक उपलब्धिका अवसरमा भारत सरकारको केन्द्रीय मन्त्रिमण्डल (क्याबिनेट) ले उनको सम्मानमा विशेष प्रस्ताव पारित गरेको छ। मन्त्रिमण्डल बैठकमा सहभागी मन्त्रीहरूले प्रधानमन्त्री मोदीको उपलब्धिको प्रशंसा गर्दै उभिएर ताली बजाएर (स्ट्यान्डिङ ओभेशन) बधाई ज्ञापन गरेका थिए।
प्रधानमन्त्री मोदीले लगातार निर्वाचित प्रधानमन्त्रीका रूपमा भारतका प्रथम प्रधानमन्त्री पण्डित जवाहरलाल नेहरूको रेकर्डलाई पछि पारेका हुन्। आम निर्वाचन जितेपछि नेहरू लगातार ४,३९८ दिन प्रधानमन्त्री पदमा रहेका थिए भने मोदीको निर्वाचित प्रधानमन्त्रीका रूपमा कार्यकाल ४,३९९ दिन पुगेको छ। उनको वर्तमान कार्यकाल अझै जारी रहेकाले यो कीर्तिमान थप लम्बिने अपेक्षा गरिएको छ।
यद्यपि, सन् १९४७ देखि १९५२ सम्मको अवधि समेत जोड्दा, जब नेहरू आम निर्वाचन विना अन्तरिम सरकारका प्रधानमन्त्री थिए, उनको कुल कार्यकाल ६,१३१ दिन पुग्छ। त्यसैले कुल कार्यकालको हिसाबले नेहरू अझै अगाडि छन्। तर निर्वाचन जितेर लगातार प्रधानमन्त्री बन्ने मामिलामा भने मोदीले नयाँ इतिहास रचेका छन्।
नरेन्द्र मोदीको नाममा देशमा सबैभन्दा लामो समयसम्म लगातार सत्ता प्रमुखको जिम्मेवारी सम्हाल्ने रेकर्ड पनि दर्ता भएको छ। गुजरातका मुख्यमन्त्री र त्यसपछि भारतका प्रधानमन्त्रीका रूपमा उनले ९,००० दिनभन्दा बढी समयदेखि निरन्तर शीर्ष कार्यकारी पदमा रहेर नेतृत्व प्रदान गर्दै आएका छन्।
मन्त्रिमण्डलले पारित गरेको प्रस्तावलाई प्रधानमन्त्री मोदीको लामो सार्वजनिक जीवन, निरन्तर चुनावी सफलता तथा नेतृत्व क्षमताप्रतिको सम्मानका रूपमा हेरिएको छ। बैठकमा मन्त्रीहरूले उनको नेतृत्वको प्रशंसा गर्दै आगामी कार्यकालका लागि समेत शुभकामना व्यक्त गरेका थिए।
