बुटवल । पुष्पकमल दाहालले आफूलाई अपमान गर्नेहरू विगतमा आफ्नै नेतृत्वबाट मन्त्री र सांसद बनेको भन्दै असन्तुष्टि व्यक्त गरेका छन्।
शनिबार बुटवलमा आयोजित नेपाल कम्युनिस्ट पार्टी (नेकपा) लुम्बिनी प्रदेश समितिको प्रथम एकता बैठक तथा प्रशिक्षण कार्यक्रममा बोल्दै अध्यक्ष दाहालले सामाजिक सञ्जालमा आफूलाई ‘बुढा’ भन्दै आलोचना गर्नेहरूप्रति आक्रोश व्यक्त गरे।
उनले भने, “यही बुढाको हड्डी घोटेर को कति पटक मन्त्री भए? कति पटक सांसद भए? अहिले यही बुढालाई अपमान गरेर छोड्नुपर्छ भन्दै हिँडेका छन्।”
दाहालले नेतृत्व कसैको इच्छा वा दबाबका आधारमा बन्ने वा हट्ने विषय नभई इतिहास, आन्दोलन र संघर्षबाट स्थापित हुने बताए। आफूभन्दा राम्रो काम गर्ने दाबी गर्दै पार्टी छाडेका नेताहरू अन्ततः असफल भएको उल्लेख गर्दै अहिले उनीहरू पुनः एकताको प्रयासमा लागेको टिप्पणी गरे।
उनले पार्टीभित्र नेतृत्व हस्तान्तरणका लागि आफू तयार रहेको स्पष्ट पार्दै राजनीति र पार्टी नछोड्ने बताए। अब आफ्नो भूमिका मात्र परिवर्तन गर्न चाहेको उल्लेख गर्दै उनले नेता तथा कार्यकर्तालाई पदको प्रतिस्पर्धाभन्दा आगामी महाधिवेशनको तयारीमा केन्द्रित हुन आग्रह गरे।
