बर्दिबास । वन क्षेत्रमा रहेको बस्ती हटाउने तयारीको विरोधमा चुरे क्षेत्रका स्थानीयवासी आन्दोलनमा उत्रिएका छन्। डिभिजन वन कार्यालयले बर्दिबास नगरपालिका–३ कालापानी क्षेत्रमा रहेको बस्ती खाली गराउन सूचना जारी गरेपछि आक्रोशित स्थानीयले बीपी राजमार्ग अवरुद्ध गर्दै प्रदर्शन गरेका हुन्।
प्रदर्शनका क्रममा स्थानीयले वन कार्यालयका कर्मचारीलाई केही समय नियन्त्रणमा लिएका थिए। स्थिति तनावपूर्ण बनेपछि प्रहरी परिचालन गरिएको थियो भने कर्मचारीलाई पछि सकुशल उद्धार गरिएको प्रहरीले जनाएको छ। आन्दोलनका कारण काठमाडौं–पूर्वी नेपाल आवतजावत गर्ने सयौं सवारी साधन बीच बाटोमै रोकिएका थिए।
स्थानीयवासीले आफूहरू वर्षौंदेखि बसोबास गर्दै आएको स्थानबाट वैकल्पिक व्यवस्थाबिना जबर्जस्ती हटाउन खोजिएको आरोप लगाएका छन्। बसोबासको सुनिश्चितता र उचित समाधान नभएसम्म आन्दोलन नरोकिने उनीहरूको चेतावनी छ।
यसैबीच, प्रदर्शन उग्र बन्दै जाँदा वन कार्यालयको सरकारी गाडीमा आगजनीसमेत भएको प्रहरीले जनाएको छ। घटनापछि नेपाल प्रहरी र सशस्त्र प्रहरीको अतिरिक्त टोली परिचालन गरिएको छ भने प्रशासनले स्थानीयसँग वार्तामार्फत समस्या समाधान गर्ने प्रयास गरिरहेको जनाएको छ।
