वीरगञ्ज । बाराको आदर्श कोतवाल गाउँपालिका–७, कोतवाली बेल्वामा करेन्ट लागेर एक वृद्धको मृत्यु भएको छ।
मृत्यु हुनेमा स्थानीय ६० वर्षीय गणेश महतो कोईरी रहेका छन्। बिहीबार बिहान करिब १०ः४० बजे उनी बिजुलीको पोलमा बत्ती बाल्न हुक लगाउने क्रममा करेन्ट लागेर गम्भीर घाइते भएका थिए।
प्रहरीका अनुसार हुकको एउटा तार विद्युत् लाइनमा अल्झिएपछि अर्को तार उनको शरीरमा खसेको थियो, जसका कारण उनी करेन्टको चपेटामा परेका हुन्।घटनापछि परिवारका सदस्य तथा स्थानीयवासीको सहयोगमा उनलाई उपचारका लागि प्रादेशिक अस्पताल कलैया लगिएको थियो। अस्पतालमा उपचारका क्रममा चिकित्सकले ईसीजी (ECG) परीक्षणपछि दिउँसो करिब १२ः०५ बजे उनलाई मृत घोषणा गरेका थिए।
घटनाको सूचना प्राप्त हुनासाथ इलाका प्रहरी कार्यालय महेन्द्र जयनगरबाट प्रहरी सहायक निरीक्षक पुजई महराको नेतृत्वमा प्रहरी टोली घटनास्थलमा पुगेर आवश्यक अनुसन्धान थालेको थियो।मृतकको शव हाल प्रादेशिक अस्पताल कलैयामा राखिएको छ। घटनाबारे थप अनुसन्धान भइरहेको प्रहरीले जनाएको छ।
