रक्सौल, भारत । विद्यार्थीहरूमा भारतीय इतिहास, संस्कृति, गौरवशाली विरासत, राष्ट्रिय मूल्य–मान्यता तथा देशका उपलब्धिप्रति जागरूकता बढाउने उद्देश्यले भारत विकास परिषद्ले आयोजना गरेको ‘भारतलाई जानौँ’ सामान्य ज्ञान प्रतियोगिताको अखिल भारतीय लिखित परीक्षा आगामी अगस्ट ३१ मा हुने भएको छ।
भारत विकास परिषद्का देशभरका करिब १ हजार ६ सय शाखामार्फत सञ्चालन हुने प्रतियोगितामा रक्सौल शाखाअन्तर्गतका १० विद्यालयका ४०० भन्दा बढी विद्यार्थी कनिष्ठ र वरिष्ठ वर्गमा सहभागी हुनेछन्।
प्रतियोगिताको तयारीस्वरूप परिषद्ले ‘भारतलाई जानौँ’ पुस्तकको हिन्दी तथा अंग्रेजी संस्करण सम्बन्धित विद्यालयमा निःशुल्क वितरण गरिसकेको जनाएको छ। विद्यालय व्यवस्थापन, शिक्षक तथा विद्यार्थीको उत्साहपूर्ण सहयोगका कारण परीक्षा सञ्चालनका लागि सकारात्मक वातावरण बनेको परिषद्को भनाइ छ।
रक्सौल शाखाका अध्यक्ष रजनीश प्रियदर्शी तथा संस्कार संयोजक नीतेश कुमार सिंहले प्रतियोगिताले विद्यार्थीलाई भारतको गौरवशाली इतिहास, संस्कृति, परम्परा र राष्ट्रिय मूल्य–मान्यतासँग जोड्न महत्वपूर्ण भूमिका खेल्ने बताउनुभयो।
प्रतियोगितामा कक्षा ६ देखि ८ सम्मका विद्यार्थी कनिष्ठ तथा कक्षा ९ देखि १२ सम्मका विद्यार्थी वरिष्ठ वर्गमा सहभागी हुनेछन्। लिखित परीक्षामा सहभागी सबै विद्यार्थीलाई शाखाको तर्फबाट प्रशंसापत्र प्रदान गरिनेछ।
प्रत्येक विद्यालयबाट दुवै वर्गमा प्रथम र द्वितीय स्थान हासिल गर्ने विद्यार्थी शाखास्तरीय प्रश्नमञ्चमा सहभागी हुन योग्य हुनेछन्। शाखास्तरीय प्रतियोगितामा दुवै वर्गबाट प्रथम र द्वितीय हुने विद्यार्थीले प्रान्तीय प्रतियोगितामा सहभागी हुने अवसर पाउनेछन्। उनीहरूलाई प्रशंसापत्रसहित प्रतीक चिह्न प्रदान गरी सम्मान गरिने जनाइएको छ।
परीक्षा निष्पक्ष र व्यवस्थित बनाउन प्रत्येक विद्यालयमा शाखाका एक सदस्यलाई पर्यवेक्षकका रूपमा खटाइनेछ। प्रश्नपत्र, परीक्षा सामग्री, पर्यवेक्षक नियुक्ति तथा विद्यालयसँगको समन्वयलगायत आवश्यक सबै तयारी पूरा भएको सम्पर्क संयोजक उमेश सिकारिया तथा सेवा संयोजक सह मिडिया प्रभारी बिमल कुमार सर्राफले जानकारी दिनुभयो।
शाखाका सचिव नरेश कुमारले विद्यालय व्यवस्थापन, शिक्षक र विद्यार्थीबाट प्राप्त सहयोगले प्रतियोगिताप्रति उत्साह बढेको बताउँदै बढीभन्दा बढी विद्यार्थीलाई ज्ञान, संस्कार र राष्ट्रबोधसँग जोड्नु परिषद्को उद्देश्य रहेको बताउनुभयो।
रक्सौल शाखाले विद्यार्थी, अभिभावक तथा विद्यालय व्यवस्थापनलाई प्रतियोगिता सफल बनाउन सहयोग गर्न अपिल गरेको छ।
