काठमाडौं । नेकपा एमाले मधेस प्रदेश सरकारबाट बाहिरिएको छ। एमालेबाट सरकारमा सहभागी चार मन्त्रीले शुक्रबार मुख्यमन्त्री कृष्णप्रसाद यादवसमक्ष राजीनामा बुझाउँदै सरकारलाई दिएको समर्थनसमेत फिर्ता लिएका छन्।
एमालेका प्रमुख सचेतक हरिनारायण महतोका अनुसार नयाँ सरकार गठनको प्रक्रिया अघि बढाउने उद्देश्यले पार्टीले सरकारबाट बाहिरिने निर्णय गरेको हो।राजीनामा दिनेमा श्रम तथा यातायातमन्त्री शारदादेवी थापा, खेलकुद तथा समाजकल्याणमन्त्री लखनदास, भौतिक पूर्वाधार विकासमन्त्री मोहम्मद समिर र शिक्षामन्त्री मनोजकुमार सिंह रहेका छन्।
नेपाली कांग्रेसका कृष्णप्रसाद यादव नेतृत्वको मधेस प्रदेश सरकारमा नेपाली कम्युनिस्ट पार्टीसमेत गठबन्धनमा सहभागी छ।एमालेका चार मन्त्रीले राजीनामा दिँदै समर्थन फिर्ता लिएपछि मधेस प्रदेशको राजनीतिक समीकरणमा फेरबदल आउने र नयाँ सरकार गठनको प्रक्रिया अघि बढ्ने सम्भावना देखिएको छ।
